Sofía Cortés, alumna do IES Sánchez Cantón, foi elixida polo xurado como a gañadora do concurso de música co que o certame Ben Veñas Maio pechou un mes enteiro poñendo en valor a creatividade escolar dos estudantes dos centros educativos de Pontevedra.
Coa súa actuación no concurso, celebrado este sábado no auditorio do Pazo da Cultura, logrou un premio de 400 euros.
O segundo premio foi para a banda Zippo, formado por Desirée da Silva Martínez e Elena Corbillón Cabrera (IES Valle Inclán), Juan Martín Ragg Lucero (IES Ponte Caldelas) e Iñaqui Amatria Barral (IES Frei Martín Sarmiento); e o terceiro para Faísca, dúo composto por Sara Rodríguez Pastoriza e Rubén Beiro Rodríguez (IES A Xunqueira II).
No concurso participaron tamén as bandas Nowheremen e Rave, máis o artista Yeray, alumno do IES Sánchez Cantón.
Ademais, o certame deu tamén a coñecer os gañadores dos respectivos concursos de banda deseñada, fotografía, curtametraxe, poesía e narrativa.
Banda deseñada: Linguas, de María Rey Noya de IES A Xunqueira I
Curtametraxes: Unha soa decisión, de Ana Fernández Arruti López do IES Sánchez Cantón.
Fotografía: Unicornio azul, de María Paz Paz do IES A Xunqueira I
Poesía: A araña, de Paula Domínguez Barreiro do IES Valle Inclán e Altea, de Noemia Veiga Gonçalves do IES Torrente Ballester
Narrativa: O diario de Jack, de Alba Fernández Blanco do IES Sánchez Cantón
O programa Ben Veñas Maio está dirixido a promover o uso da lingua na mocidade de Pontevedra a través do impulso da creatividade.
Xunto con estes concursos, celebrouse tamén a Semana Teatral durante a que se representaron as obras nas que estiveron a traballar os grupos de teatro dos centros de ensino.
Durante toda a semana, o Teatro Principal acolleu as representacións de O meu baúl azul, do Grupo Skene (IES Valle Inclán); As aventuras do pequeno Quixote, do grupo teatro Fiúncho (IES Luís Seoane); As asembleístas, do grupo de teatro Os Autorizados (IES Torrente Ballester); e Unha rosa é unha rosa, do grupo de teatro do IES Sánchez Cantón.