O Pazo Besada reunirá este próximo sábado, 28 de outubro, a músicos das catro provincias galegas para participar nas xornadas 'O Son da Gaita', unha das principais citas gaiteiras galegas e que está organizada pola Asociación Cultural Pai da Cana, en colaboración co Concello de Poio, da Xunta de Galicia e da Deputación de Pontevedra.
Este evento reúne a algúns dos máis importantes gaiteiros e gaiteiras de Galicia, con estilos e linguaxes ben diferenciadas, creando así un espazo destinado á posta en valor da gaita, dos gaiteiros e da música tradicional.
A concelleira de Cultura e Educación de Poio, Natalia Sabarís, e o secretario xeral de Política Lingüística, Valentín García, presentaron este mares a programación en Santiago de Compostela, xunto con Óscar Ibáñez García, presidente da asociación cultural Pai da Cana.
Natalia Sabarís explicou que a cita está dirixida a "todas as persoas sensibles á nosa cultura, non necesariamente especialistas" e permite amosar as diferentes técnicas interpretativas, así como as posibilidades e riqueza a través das distintos xeitos de abordar o instrumento.
A organización informa de que é preciso reservar praza enviando un correo electrónico a acpaidacana@gmail.com. Neste momento as prazas están a piques de completarse, as últimas estarán dispoñibles ata o venres 27 de outubro.
Ás 10.00 horas dará comezo un pasarrúas polas avenidas A Barca, Andurique e Porteliña de Poio a cargo da Banda de Gaitas Airiños de San Xulián de Marín e do grupo Os Fervellos do Pío de Pontevedra. En caso de choiva, estas actuacións levaranse a cabo tamén no Pazo Besada.
Ás 11:15 horas, xa no interior do edificio, será a quenda dos grupos 'Contracocheno' de Vigo, 'As Fabulosas da Baña' e o Grupo de Música Tradicional da AGADIC da Xunta de Galicia.
A partir das 12.00 horas presentarase a colección Tradición Oral da Editorial Canela por Pablo Quintana e os artesáns Antón Corral e Xosé Manuel Gil presentarán Punteiro con subtónica.
A parir das 12:45 horas actuarán os solistas Edelmiro Fernández, de Ribeira; Bruno Villamor, de Lugo; Paulo Gonçalves, da Cañiza; Magoia Bodega, de Vigo; e Xaquín Xesteira, de Cambados.
A xornada rematará cun xantar-foliada en Casa Laura, en Campelo.
Para asistir ao apartado Solistas hai que pagar unha entrada de 6 euros, e para o xantar o custo do prato é de 27 euros.