A Banda de Música de Pontevedra puxo este xoves o seu gran de area no Salón do Libro Infantil e Xuvenil. Foi co concerto A sinfonía das fábulas, no que colaboraron coa contadora Raquel Queizás e o alumnado do Máster en Libro Ilustrado da Facultade de Belas Artes.
O Teatro Principal envolveuse dunha maxia especial. Música, contos e ilustracións mesturáronse sobre o escenario con este espectáculo inédito, deseñado en exclusiva para o Salón.
Nel, a contadora Raquel Queizás, no papel da Micha Bicho -una gatiña adorable- e as ilustracións do alumnado de Belas Artes, dirixidos por Itziar Ezquieta, acompañaron á música da banda pontevedresa.
Un traballo conxunto onde a palabra, a música e as ilustracións deron vida a diferentes fábulas e contos clásicos coñecidos por todos.
Así, os nenos puideron gozar coas especiais interpretacións, entre outros, dos contos O león e o rato, O frautista de Hamelin, A lebre e a tartaruga, O parruliño feo ou Os tres cabuxiños.