A xornada deste domingo no Salón foi ben especial. Ademais de acoller o espectáculo xira de despedida da compañía Pontevedresa Baobab Teatro tamén tivo lugar entre as 11 e as 14 horas a Troca de Libros.
Esta iniciativa estivo coordinada por David Castro, do IES Torrentes Ballester, e contou con máis de 10.000 libros para trocar entre as preto de 1.500 persoas asistentes.
A expectación era máxima, e como proba a ringleira de xente agardando na porta antes de que abrira o Recinto Feiral.
Nesta Troca de Libros participaron 18 centros de ensino de Pontevedra: os sete institutos da cidade, as Anpas, a Escola Oficial de Idiomas e os CEIP Álvarez Limeses, de Marcón, Vilaverde, Vidal Portela, Barcelos e San Martiño; os CEP Campolongo e Marcos da Portela; os CPR Calasancio e Sagrado Corazón.
A mecánica é sinxela, tratábase de cambiar os libros que previamente se deixaron nos centros colaboradores polos miles de volumes que enchían as casetas.
A condición é que sexan libros de literatura infantil ou xuvenil e que estean ben coidados.
Quen entregou un libro recibiu un vale e este domingo era o momento de canxealo por outro libro no Salón.
O obxectivo é darlle unha nova vida aos libros con outras persoas que os volvan ler e desfrutar.