A Deputación de Pontevedra presentou este xoves o programa de concertos para reforzar o efecto promocional de La Vuelta ciclista a España, que supoñerá, tal e como coincidiron en destacar ao presidente da Deputación, Rafael Louzán, a deputada Begoña Estévez e a alcaldesa de Sanxenxo, Catalina González, o maior e mellor escaparate das Rías Baixas no mundo enteiro.
Os tres fixeron estas declaracións no acto de presentación dos concertos de La Vuelta, no que tamén participou o director de Unipublic, Javier Guillén.
Trátase dunha programación musical que dará comezo este sábado coa actuación de Julieta Venegas en Cambados coincidindo coas Festas do Albariño, con Eladio e Los Seres Queridos como teloneiros, e continuará con El Sueño de Morfeo, que actuará o 16 de agosto no Grove. Nena Daconte pechará o ciclo de concertos o día da saída de La Vuelta, o 24 de agosto, cunha actuación en Sanxenxo que estará precedida da dos galegos Maryland.
Tamén actuarán Roi Casal, o 23 de agosto en Cangas e o 26 en Lalín; e Xoel López e Amancio Prada o día 24 en Salvaterra de Miño.
Rafael Louzán animou pontevedreses e visitantes a "implicarse de cheo neste evento", dando novamente un exemplo coa saída masiva á rúa para seguir o paso da serpe multicolor en cada un dos pobos polos que pase. E anunciou que nos próximos días se distribuirá numerosa información relativa ás distintas etapas na provincia e ás actividades paralelas que se organizan.
Pola súa banda o Director xeral de Unipublic, Javier Guillén, insistiu en que La Vuelta quere ser ante todo "una ventana promocional que muestre esta maravillosa tierra y sus escenarios que con tanto mimo cuidamos, a nivel internacional". E anunciou que "gracias a la contribución que tuvo Galicia en La Vuelta del pasado año, conseguimos renovar el contrato de retransmisión con TVE por 3 años más, una oportunidad para seguir enseñando España a los españoles y al mundo entero".
En resposta a preguntas dos xornalistas, Javier Guillén salientou que está confirmada a participación de ciclistas do nivel de Purito Rodríguez, Alejandro Valverde, Samuel Sánchez, Philippe Gilbert ou Fabián Cacheda, entre outros.