O Museo de Pontevedra programa este venres, 10 de xaneiro, o tradicional concerto 'Despedida do vilancico', unha cita musical que alcanza xa os 70 anos de historia.
O evento, que terá lugar ás 19:30 horas na igrexa de San Bartolomeu, contará coa participación de catro prestixiosas agrupacións musicais pontevedresas.
Este concerto marca o inicio das celebracións do centenario da Coral Polifónica de Pontevedra, que desenvolverá unha ampla programación ao longo de 2025.
O programa divídese en dúas partes. Na primeira, actuarán o Coro Canticum Novum, baixo a dirección de Fernando Olbés, e o Coro García Limeses, dirixido por Reyes Carballo, que interpretarán: "Da Ulla ao meu cabo veño", de Melchor López Jiménez, e "Christmas Melodiese", de Battista Pradal.
A segunda parte contará coa participación adicional da orquestra infantil do Conservatorio Profesional de Música Manuel Quiroga, dirixida por Sergio Heredia.
As tres formacións ofrecerán un repertorio que inclúe pezas tradicionais como "O bo Rei don Wecenslao", "The First Noel" e "The Little Town of Bethlehem", entre outras.
Na parte final, a Coral Polifónica de Pontevedra unirase ao resto de formacións para interpretar "Adeste fideles" de John Reading e "Stille Nacht" de Franz X. Gruber, poñendo o broche de ouro a este encontro musical.