O humor máis absurdo de Faemino e Cansado arrasa entre o público pontevedrés

Máis de trinta de traxectoria humorística xuntos consolidaron a Faemino e Cansado como un dos dúos cómicos máis populares do noso país.

E, a pesar de todo este tempo transcorrido, seguen facendo rir á xente a gargalladas como o primeiro día, despregando todo o seu humor absurdo e surrealista

E iso volveu a pasar, unha vez máis, en Pontevedra. Centos de persoas abarrotaron este domingo o auditorio de Afundación para gozar en directo de 17 veces reloaded.

Neste espectáculo, co que a parella leva de xira un tempo, estes xenios de humor fan o que lles dá a gana e agora, á súa idade, con máis motivo.

Así, pasearon sobre as táboas de Pontevedra un show "refeito, revisado, evolucionado e novamente montado", no que recuperaron algúns dos seus mellores momentos.

Fieis ao seu estilo irónico e despreocupado, ambos presentaron na Boa Vila o que definen como a metamorfose do seu humor crítico e surrealista.

O que, segundo eles mesmos, é o espectáculo máis rupturista da súa traxectoria, fixo as delicias do público pontevedrés. Foi hora e media sen parar de rir a gargalladas.

Desde os seus shows na rúa até a máis reputada cima humorística, Faemino e Cansado escalaron e conquistado a montaña do espectáculo coa risa como único instrumento e ameazan con seguir facéndoo.