A música non deixou de invadir a rúa durante os dous últimos días en Pontevedra. Catorce concertos en tan só dúas xornadas encheron de música as principais prazas do centro da cidade da man do programa municipal Paseantes, que este venres e sábado celebrou a súa segunda edición incrementando o éxito e boa aceptación da estrea no verán de 2015.
Jazz, folk, art rock, pop de autor, rock & soul ou música clásica, entre outros estilos musicais, soaron a pé de rúa, acompañando a pontevedreses e visitantes mentres daban un paseo ou tomaban un aperitivo, comían ou ceaban. E o mellor foi que, ademais, eses concertos chegan por sorpresa, montábanse os escenarios nun abrir e pechar de ollos e, rematada a actuación, volvían desaparecer coa mesma axilidade.
Os músicos paseantes xa saíron á rúa desde o mediodía deste venres e este sábado, aproveitando o bo tempo e a xornada de lecer de moitos cidadáns, volveron. Nesta ocasión, as citas foron nas prazas de abastos, Méndez Núñez, Verdura e Teucro e en todas elas tiveron boa resposta do público que, en ocasións, os atopaba a medida que paseaba e, noutras, xa gardaba sitio e os agardaba con antelación.
A banda sonora deste sábado chegou da man do estilo rockabilly de Breakin'Bones ás 12.00 horas na praza de abastos; de Appel Tree (new croner) e Xoán Curiel (worldmusic) ás 13.00 e as 14.00 horas en Méndez Núñez; doQuinteto Rubato de música clásica e o pop de autor de Silvia Penideás 19.00 e as 20.00 horas na praza da Verdura; e da fusión musical de Mónica de Nut e Vixilio da Silvia e o rock & soul de The Lakazansxa ben entrada a noite no Teucro.