O ciclo Pontevedra Escénica chega ao seu fin. E faino coa representación de De amor y lujuria, unha obra baseada en textos clásicos do Século de Ouro e protagonizada, entre outros, por Emilio Gutiérrez Caba e María José Goyanes. Esta sétima e última cita co teatro terá lugar este xoves 19 de xuño, a partir das 21.00 horas, no Pazo da Cultura.
De amor y lujuria, dirixida pola propia María José Goyanes, mostra mediante unha selección de poemas como destacados autores da literatura tratan na súa poesía as diferentes facetas do amor, dende a pureza do seu descubrimento ata a paixón, ao transitar por aquelas etapas nas que os celos e os desencontros chegan a destruír o sentimento.
O erotismo como parte integrante do amor, a paixón e mesmo a luxuria son tratados en poemas sorprendentes de Lope de Vega, Calderón, Cervantes, Quevedo, Tirso de Molina, Luis de Góngora, Meléndez Valdés e Fray Damián Cornejo, entre outros.
Goyanes, encargada de seleccionar estes poemas, destaca que "foi unha verdadeira satisfacción descubrir algunhas pezas insólitas que pouco a pouco ían formando parte desta recompilación, e unha alegría recordar poemas para min moi queridos como Amor divina invención, de La Dama boba, co que me enfrontei a Lope por primeira vez na miña carreira como actriz,".
A actriz e directora engade que "o pracer que un actor sente ao recitar debe ser semellante ao do autor cando alcanza eses momentos de inspiración; e os que estamos neste proxecto compartimos ese sentimento e desexamos contaxialo ao público, para que xuntos gocemos do amor en todos os seus matices por medio da poesía".
A obra, na que tamén participan os actores Jesús Castejón e Cristina Goyanes, estreouse no Festival de Almagro de 2013, protagonizando posteriormente unha ampla xira por festivais de Teatro Clásico e teatros públicos. Trátase dun espectáculo moi divertido, segundo os seus autores, con textos que estiveron prohibidos e silenciados moito tempo sobre o amor, o erotismo e a luxuria.
As entradas están á venda en www.servinova.com. En caso de que non se esgoten, poderanse adquirir dúas horas antes da función no despacho do propio Pazo dá Cultura.