O luns, día 31, a Sociedade Filharmónica de Pontevedra ofrecerá aos seus socios un novo concerto. Nesta ocasión estará protagonizado polo dúo formado polo violinista Ivan Zenaty e o pianista Stanislav Bogunia. O concerto celebrarase no Teatro Principal e dará comezo ás 20:30 horas.
Ivan Zenaty está considerado pola crítica e os seus compañeiros músicos como o mellor violinista checo da actualidade. ÿ invitado con frecuencia por prestixiosas orquestras europeas, como a Filharmónica Checa, a Orquestra da Radio de Praga, a Sinfónica da BBC de Londres, a Sinfónica da Radio Bávara, o Nacional de España ou a Berliner Symphoniker. Ten no seu haber numerosas gravacións para Dorian Recordings coas obras completas de Telemann, Bach, Mendelssohn, Schumann, Dvorák e Grieg. Zenaty toca un violín Giuseppe Guarneri del Gesu do ano 1740.
Stanislav Bogunia, nacido en Moravia, estudou piano, dirección de orquestra e composición na Academia de Música de Praga, onde se graduou como pianista e director. Dirixiu varias orquestras checas, incluíndo a Sinfónica da Radio de Praga.
Ivan Zenaty e Stanislav Bogunia ofrecerán en Pontevedra o programa seguinte: Sonata para violín en Sol menor, op. 27 n.º 1, de Eugène Ysaÿe; Sonata para violín e piano en Mi bemol maior, op. 18, de Richard Strauss; Fantasías para violín e piano sobre temas das óperas "A noiva vendida" e "Carmen", de Frantisek Drdla; e Fantasía para violín e piano sobre temas da ópera "Fausto", de Pablo de Sarasate.