‘El misterioso caso del impostor del Titanic’ é unha novela disfrutona que asina Carmen Posadas. Un feito histórico, unha trama ficcionada ao redor daquel suceso, un enigma por resolver, personaxes reais e inventados que converxen no Madrid das primeiras décadas do século pasado e sentido do humor.
A millonaria viúva de Peñasco ten un mal presentimento o 15 de abril de 1912. Algo lle sucedeu ao seu fillo e a súa recente esposa, quen supostamente, gozaban da súa lúa de mel en París. Aquel pálpito era certeiro, a parella embarcouse no Titanic. Dez anos despois do naufraxio aparece vivo un potentado indiano asturiano.
Posadas embarca nunha das lendas que perviven ao redor do afundimento do buque británico a unha galega universal: Emilia Pardo Bazán. Á condesa "encantábanlle as novelas policiais e xa escribiu dez anos antes que Agatha Christie a súa novela detectivesca con Ignacio Selva", a quen tamén inclúe na novela, converténdoos en “os meus particulares Sherlock e Watson”.
A modo de cameos cinematográficos, no reparto de ‘El misterioso caso del impostor del Titanic’ aparecen Benito Pérez Galdós, Miguel de Unamuno, Xullo Camba, Gómez da Serna, Jacinto Benavente, Rosalía de Castro,…
Unha homenaxe literaria que "non é deliberada, pero é certo que quería retratar esa época e son os contemporáneos de Emilia", explica a autora no podcast 'Cara a cara'.
Ese lenzo de principios de século tamén mostra cambios, costumes e mitos sociais daquel momento. Por exemplo o da moda feminina e o inicio do acortamiento do longo dos seus vestidos, vencellado ao avance na incorporación laboral da muller.
Ou o mito da terra prometida en Cuba recreado polos captadores que ían percorrendo pobos difundindo o espellismo dun maná garantido; e tamén as 'viúvas de vivos' ou 'viúvas brancas' das que falaba a poetisa compostelá.
Así, entre portada e contraportada, quen abra estas páxinas pode escoller dúas cotas de entretemento que espremeron o oficio de Carmen Posadas: "custoume sangue das miñas veas porque quería que tivese dous niveis de lectura. Unha, descubrir a historia detectivesca e outra máis intelectual ou literaria. Todo envolvido en humor e un aire lixeiro".