O Auditorio do Grove acollerá este domingo 30 de marzo ás 19:00 horas, o espectáculo teatral 'Bravas', protagonizado por Isabel Risco. A entrada será libre ata completar a capacidade do recinto.
Esta peza unipersoal afonda na historia das mulleres galegas, reivindicando figuras valentes e loitadoras que, ao longo dos séculos, sufriron a invisibilización.
Baixo a dirección de Fran Rei, 'Bravas' aposta por unha proposta escénica onde o humor e o compromiso social convértense en ferramentas de reflexión.
A través dun percorrido temporal que abrangue desde a época castrexa ata o século XXIII, Isabel Risco métese na pel de diferentes mulleres galegas, dende labregas ata loitadoras da revolución industrial ou novas que exploran o mundo nos anos 60.
O espectáculo conta con textos de Paula Carballeira, Clara Gayo, Roi Vidal e Xurxo Barcala. As súas aportacións enriquecen esta proposta teatral cunha visión plural e comprometida.
Ademais, ’Bravas’ foi recoñecido co Premio Luisa Villalta de Igualdade da Deputación da Coruña, un galardón que destaca o seu valor na loita pola visibilidade e os dereitos das mulleres.
O humor serve aquí como vehículo de denuncia e resistencia, subliñando a importancia da comedia feita por mulleres como unha perspectiva necesaria e diversa da realidade.
Cunha duración de 80 minutos, 'Bravas' propón unha experiencia teatral onde a rebeldía, a valentía e a xustiza social erguen a voz a favor das que nunca calaron.