Alberto Martín Méndez é un pontevedrés, doutor en Matemáticas pola Universidade de Santiago de Compostela, que ama a poesía.
En 1988 obtivo un accésit do premio Adonais de poesía co libro 'Biografía de un traficante de no sé', publicado por Edicións Rialp.
Cos anos a súa produción literaria foi máis esporádica e as súas publicacións redúcense a revistas e suplementos mentres desenvolvía a súa carreira profesional. Actualmente é profesor do Departamento de Matemática Aplicada II da Universidade de Vigo.
Neste 2024 volve á poesía co seu traballo 'El arco iris de más de ocho colores', que será presentado este mércores 12 ás 20.00 horas na biblioteca do IES Sánchez Cantón con entrada libre. O escritor Manuel Pérez Lourido participará na presentación desta obra.
Este poemario divídese en tres secciones: infancia, compañeira e despedida. Nelas reflíctese o amor á vida cun lirismo intenso e, en ocasións, duro e visceral.
O estilo de Martín Méndez ofrece escasos signos de puntuación e non emprega letras maiúsculas nos seus versos, onde se achega ás súas experiencias recollendo loitas e abandonos.
Os medos que provoca o paso do tempo con perdas e recordos expándense por este libro cheo de nostalxia.