A directora pontevedresa Marta Pazos continúa coa súa carreira de éxitos e anuncia que na primavera de 2023 estreará no Gran Teatre del Liceu de Barcelona a ópera 'Alexina B.', unha obra de Raquel García-Tomás, premio Nacional de Música 2020. A creadora galega será a encargada da dirección de escena converténdose na mestra de cerimonias da estrea da segunda ópera composta por unha muller nos 175 anos de historia deste antigo e prestixioso espazo teatral.
A primeira ocasión en que unha muller debutaba cunha montaxe operística se remonta a 1974, cando Matilde Salvador estreaba 'Vinatea'. Nesta ocasión, Marta Pazos aborda a dirección do universo sonoro de García-Tomás coa que xa colaborou en 'Je suis narcissiste' afrontando o binarismo de sexo e xénero e cuestionando o heteropatriarcado. Ademais, segundo avanza, tamén terá presenza na posta en escena a violencia das institucións médicas e relixiosas.
O libreto de 'Alexina B.' está asinado por Irène Gayraud, partindo das memorias de Adélaide Hérculine Barbin, coñecida como Alexina B., unha persoa intersexual á que atribuíron o sexo feminino cando naceu en 1838 en Francia. Alexina reivindicouse como home e pasa a converterse en Abel Barbin, pero termina coa súa vida ao ser incapaz de adaptarse.
Esta produción propia do Liceu estrearase o 18 de marzo de 2023 coa Orquestra Sinfónica do Gran Teatre do Liceu, dirixida por Josep Pons e cunha repartición con Lidia Vinyes-Curtis, Alicia Amo, Elena Copons, Xavier Sabata e Mar Esteve.
ESTREA DE 'ÁS OITO DA TARDE, CANDO MORREN AS NAIS' DO CDG
Marta Pazos aborda durante este ano a estrea doutras montaxes. O máis inmediato será o xoves 14 de abril no Salón Teatro de Santiago de Compostela. Neste escenario poderase ver a produción'Ás oito da tarde, cando morren as nais', do Centro Dramático Galego (CDG) cun elenco interpretativo formado por Camila Bossa, Sabela Domínguez, Xosé Manuel Esperante, Davide González, María Llanderas, Alba Loureiro e Toni Salgado. A historia está baseada no texto de AveLina Pérez e Marta Pazos asume a dirección e a dramaturxia.
Pazos tamén presentará en xullo'Safo', un proxecto compartido coa actriz e música Christina Rosenvingeno marco da 68 edición Internacional Festival de Teatro Clásico de Mérida. A directora pontevedresa asume a dirección de escena, a escenografía e a dramaturxia deste espectáculo sobre o imaxinario da poeta de Lesbos, unha figura lendaria da que non se conservan poemas completos.
Durante a pasada fin de semana, a compañía Voadora, que dirixe Marta Pazos, visitaba Pontevedra coa representación no Pazo da Cultura do espectáculo 'Othello', baseado no texto orixinal de Shakespeare.