A Casa das Campás enchoupase de José Saramago no 20 aniversario do seu Nobel

Catro conferencias e 15 comunicacións son o principal eixo das xornadas que se inauguraban este luns na Casa das Campás de Pontevedra e que levan por título 'Saramago nos 20 Anos do Premio Nobel: Literatura, Arte e Política'. Organizadas pola Cátedra Internacional José Saramago da Universidade de Vigo, esta cita xunta especialistas de diversas áreas co obxectivo de analizar a figura do escritor portugués, tal e como publica o DUVI.

Estas xornadas, que se desenvolven ata o 5 de decembro, contan cunha exposición con cinco animacións realizadas por alumnado do máster en Libro Ilustrado e Animación audiovisual empregando a maquinaria ideada polo intelectual no libro Memorial do Convento.

Ademais, durante a xornada do xoves, ás 19.00 horas, está previsto que se realice unha performance titulada 'Do poleiro a sombra', a cargo do grupo Electroplasma, formado polo peta vigués Xurxo Nóvoa e o músico portugués Alexandre Soares. Será na Sala X, de Belas Artes.

Á inauguración, ademais de diversos representantes da Universidade de Vigo como a vicerreitora de Comunicación, Mónica Valderrama e Silvia García, decana da Facultade de Belas Artes, asistía a concelleira de Cultura, Carmen Fouces, que quixo facer referencia á obra 'A Caverna', indicando que en Pontevedra se prioriza ás persoas e aos oficios.