"Ladrón de risas", da compañía Expresión Producións, no auditorio da Azucreira de Portas

A Deputación de Pontevedra pecha o pano do primeiro ciclo do circuíto +Escénicas este domingo 23 de marzo no concello de Portas.

A función será a última programada nesta primeira edición dunha iniciativa provincial que apoia a programación de teatro e danza nos concellos de menos de 20.000 habitantes da provincia. 

A última función que se representará desta primeira convocatoria será "Ladrón de risas", da compañía Expresión Producións, ás 19:00 horas no auditorio da Azucreira.

Trátase dunha comedia para público adulto que inclúe tres historias en tres vivendas dun mesmo edificio, o edificio dos corazóns. Nunha escoitan ruídos, noutra mesturan traballo e amor e na última estase organizando unha cea de amigos, pero aínda o poden pasar mellor.

En todas as historias nada é o que parece e os ladróns só rouban sorrisos.

Auditorio da Azucreira de Portas