Unha Gran Final das Series Mundiais que puxo "a pel de galiña" a Pontevedra
Será difícil que Pontevedra volva organizar un evento dunha magnitude tan grande como o que supuxo no 2023 para a cidade a Gran Final das Series Mundiais de Tríatlon, a non ser que se atreva a repetir a experiencia.
Máis aló da posibilidade aberta tras a proba, o certo é que as finais do Mundial de Tríatlon foron unha cita para a historia, e deixaron unha imaxe que dificilmente se borrará da memoria dos pontevedreses, a dunha cidade totalmente colapsada para seguir a competición en vivo e mostrarse ao planeta como unha das grandes capitais do tríatlon mundial.
Os números foron descomunais. A organización cifrou en 40.000 as persoas que seguiron en directo nas rúas da cidade a carreira elite masculina, na que a nivel deportivo viviuse un gran espectáculo co triunfo contra prognóstico do francés Dorian Coninx. Na carreira elite feminina a vencedora foi a británica Beth Potter, cunha cifra de espectadores lixeiramente menor pero igualmente espectacular.
En total competiron en Pontevedra case 3.000 deportistas de 63 países, quedando todos eles prendados da Boa Vila. Foi así desde os competidores nos grupos de idade ata chegar aos profesionais. Moitos deles de feito así o mostraron nas súas valoracións. "A multitude púxome a pel de galiña. É realmente algo que lembrarei durante anos", afirmaba por exemplo o cuarto clasificado nos Xogos de Tokyo, o surafricano Richard Murray.
Os encomios á capital provincial chegaron tamén desde a Federación Internacional e Española, defendendo o máximo representante nacional que "as próximas sedes terán que mirar a Pontevedra para marcar como teñen facer unha Gran Final", chegou a dicir José Hidalgo.
Foi tal a satisfacción que a World Triathlon abriu a opción para volver a traer a Pontevedra as Series Mundiais, a súa máxima competición. Así o sinalou o alcalde, Miguel Anxo Fernández Lores, sinalando que "está aberta esa posibilidade", aínda que será en cuaquier caso despois dos Mundiais Multideporte xa concedidos á Boa Vila para o ano 2025.
Á Gran Final das Series Mundiais non lle faltou de nada. Actividades paralelas con concertos na Praza de España, bo clima, emoción, unha sentida homenaxe a Javier Gómez Noya e ata polémica e historias desafortunadas, cunha amarga medalla de prata para a paratriatleta Susana Rodríguez perdendo o ouro por mor dunha polémica sanción e coa caída saíndo do hotel da única galega presente na proba elite feminina, Sara Guerrero, obrigándoa a abandonar antes de competir.
A Gran Final das Series Mundiais foi un reto organizativo descomunal, no que foi necesario o traballo de ata 1.500 persoas, con preto de 800 voluntarios que completaron o operativo en diferentes labores. Ata 80 deses traballadores foron despregados por Radio Televisión Española, que ofreceu o sinal internacional en directo das principais carreiras para máis de medio mundo. Todo un escaparate no que a gran vencedora foi Pontevedra.
Relacionadas:
-
Pontevedra presentará candidatura para organizar de novo en 2027 a Gran Final das Series Mundiais
Por Diego Espiño |
-
192 árbores en Tomeza "compensarán" as emisións de CO2 da Gran Final das Series Mundiais de Tríatlon
Por Redacción |
-
A Gran Final das Series Mundiais de Tríatlon, en cifras
Por Redacción |
-
VÍDEO.- Así foi a homenaxe a Javi Gómez Noya, con mensaxes de Alistair Brownlee, Pau Gasol ou Carolina Marín
Por Redacción |
-
Días despois, os triatletas seguen alucinando con Pontevedra: "Púxome a pel de galiña. É algo que lembrarei durante anos"
Por Diego Espiño |
-
Optar a repetir outra Gran Final das Series Mundiais?: "Está aberta esa posibilidade"
Por Diego Espiño |
-
"As próximas sedes terán que mirar a Pontevedra para ver como facer unha Gran Final"
Por Diego Espiño |
-
Beth Potter reina en Pontevedra e pon o broche a unha inesquecible Gran Final das Series Mundiais
Por Diego Espiño & Mosrey Fotografía |
-
Pontevedra, ateigada, exhíbese ao mundo nunha emocionante Gran Final Masculina
Por Diego Espiño & Mosrey Fotografía |
-
Os triatletas réndense a Pontevedra: "Nunca vivira unha carreira así, con tanta xente animando"
Por Diego Espiño & Mosrey Fotografía |