Adestramento do Pontevedra en Pasarón

Adestramentos "de calidade" e poucas probas para as dúas últimas semanas de pretempada

Por Diego Espiño
Luns 15 de Agosto, 2022 ás 08:00 do Luns 15 de Agosto, 2022

Dúas semanas de pretempada réstanlle só ao Pontevedra antes de iniciar o 28 de agosto a competición en Primeira RFEF cunha visita do Alcorcón ao Estadio Municipal de Pasarón.

En realidade ao equipo granate quédanlle só uns días de adestramento propio de pretempada, xa que o luns 22 entrarán na primeira semana de liga, cunha preparación específica e centrada exclusivamente no seu esixente debut.

Por ese motivo a partir de agora "os adestramentos van ser de calidade", explicou xa Antonio Fernández o pasado mércores tras o amigable contra o Coruxo, e é que os últimos compromisos amigables como o afrontado contra o Juvenil Ponteareas ou o previsto o día 17 na Estrada "van ser máis fáciles e haberá pouco que ver", recoñeceu o técnico.

Desta forma o preparador granate eleva a esixencia nas sesións de adestramento, nas que espera ir incorporando aos futbolistas que arrastraron problemas físicos as últimas semanas e que se perderon varias citas amigables, como Álex González, Brais Abelenda e Samu Araújo.

Caso aparte é o de Diego Seoane, cuxo obxectivo é o de chegar plenamente recuperado da súa lesión de pube ao comezo de liga, aínda que o fará sen sumar minutos durante o verán.