Veñen curvas para o Pontevedra
Por Diego Espiño
Os últimos resultados colocaron o Pontevedra Club de Fútbol nunha situación delicada na clasificación da Segunda División B nun momento no que chega unha das fases máis complicadas, a priori, do calendario.
Os granates acumulan tres xornadas sen gañar despois da derrota o domingo a domicilio ante o Inter de Madrid, e caeron a postos de promoción pola permanencia, ao ser décimo sextos con 5 puntos, os mesmos que a primeira praza de descenso.
Unha vitoria (Leonesa), dous empates (Navalcarnero e Valladolid B) e dúas derrotas (Unionistas e Internacional de Madrid) son os números do irregular comezo do equipo, lonxe do esperado tras unha pretempada en clave positiva.
Chegados a este punto os de Luismi necesitan empezar a sumar de tres en tres para evitar meterse nos problemas da pasada tempada, e iso pasa por superar nas próximas semanas a tres dos catro equipos que ocupan actualmente praza de play- off de ascenso. Toda unha arma de dobre fío que pode levantar os ánimos do equipo ou terminar de afundilo na táboa.
O primeiro en chegar será o filial do Real Club Celta, o vindeiro domingo 30 de setembro (17:00 horas) no Estadio Municipal de Pasarón, actual segundo clasificado con 12 puntos (4 vitorias e unha derrota). Despois o Pontevedra viaxará ao feudo doutro dos máximos candidatos ao ascenso como o Fuenlabrada, cuarto con 10 puntos, pechando esta fase a visita do líder Ponferradina (13 puntos con catro triunfos e un empate) o domingo 14 de outubro.
Na parte positiva, e sacando pequenas molestias, a enfermería baléirase coa volta ao traballo de grupo de Nacho Lorenzo superada a súa lesión de xeonllo.
Relacionadas:
-
Polémica e emoción pero pouco xogo para un empate sen goles entre Pontevedra e Celta B
Por Diego Espiño & Diego Torrado |
-
As "arenas movedizas" ameazan o Pontevedra ante a visita do Celta B
Por Diego Espiño |
-
Luismi apela á "calma y tranquilidad" pero recoñece que de non gañar ao Celta B a situación volveríase "preocupante"
Por Diego Espiño |
-
Duro e esaxerado correctivo do Inter de Madrid a un Pontevedra sen capacidade de reacción (3-0)
Por Redacción |
-
Luismi queda coa capacidade de reacción
Por Diego Espiño |
-
Un impreciso Pontevedra salva os mobles de penalti ante o Valladolid B (1-1)
Por Diego Espiño & Diego Torrado |