Rueda empeza o camiño para suceder ao "insubstituíble" Feijóo: "A quinta maioría absoluta empeza hoxe aquí"
Por Natalia Puga & Mónica Patxot
Alfonso Rueda está a vivir "o momento máis importante da miña vida política sen ningunha dúbida" e quixo compartilo co partido que hai seis anos o converteu en presidente, o PP provincial de Pontevedra. Agora aspira a converterse no presidente do PP galego e, para facelo, quixo poñerse diante dos seus, os que o apoiaron como líder provincial, e pedirlles o seu apoio porque "a miña forza a collo aquí".
Este venres, situouse ante ao redor de 250 integrantes do seu partido nunha Xunta Provincial do PP na Finca Batacos e, por momentos coa voz crebada, e case sempre emocionado, anuncioulles que presenta a súa candidatura para presidir o PP de Galicia.
Salvo sorpresa maiúscula, será o único candidato no congreso extraordinario que se celebrará nesta mesma cidade de Pontevedra os días 21 e 22 de maio, pero este venres comezou a carreira e fíxoo, desde a total "humildade", e sen querer dar nada por feito.
Todo o partido o considera xa o novo presidente galego e substituto de Alberto Núñez Feijóo, pero el anunciou que "non vou dar ningunha batalla por gañada" e vai percorrer toda Galicia pedindo o apoio dos afiliados.
A voz crebóuselle en tres ocasións e recoñeceu a emoción que o invade ante este momento tan decisivo, mesmo que sente "vértigo" e está "abrumado" e "asustado, non sabedes ata que punto". Esa inquietude, de todas as maneiras, non lle impide amosar confianza, a que lle da sentirse apoiado polos seus.
E ese apoio foi unánime. Este venres, se pasaran lista, non faltaba ninguén, desde alcaldes, concelleiros e voceiros do partido de todos os concellos da provincia a conselleiros do Goberno no que el leva 13 anos (os titulares de Sanidade e Educación, Julio García Comesaña e Román Rodríguez), líderes nacionais como Ana Pastor e deputados estatais como Diego Gago ou Juan Constenla.
Recibírono ao grito de "presidente, presidente" e en varias ocasións interromperon o seu emocionado discurso para repetirllo. O presidente local do PP de Pontevedra en funcións, Rafa Domínguez, confirmouno no seu discurso de benvida, no que asegurou que "non coñezo a ninguén máis preparado" e lembrou que no partido xa todos lle chaman o "xefe".
Alfonso Rueda amosouse moi seguro da "fortaleza" do PP e moi agradecido ao legado que deixa Alberto Núñez Feijóo. Ao seu predecesor, e actual líder do PP nacional, referiuse en varias ocasións como un político "extraordinario" cun "liderado fortísimo" e tamén quixo deixar claro que non tiña intención de substituílo, senón de continuar co traballo feito desde que 2006 se converteu en presidente do PP e en 2009 da Xunta de Galicia.
"Non veño aquí a substituír a ninguén, sería imposible. Veño continuar a labor de alguén insubstituíble, pero que hai que substituír", sinalou. Así, recoñece que o "paso valente e emocionante" que deu Feijóo deixando Galicia por presidir o PP nacional non era o que máis querían no partido, pero era necesario e deulle todo o seu apoio nesta nova etapa.
De feito, tamén lle pediu o seu apoio á Xunta Directiva do PP provincial para axudar a que Feijóo se converta no próximo presidente do PP de España. Nesta nova etapa, Rueda márcase tres obxectivos, axudar a Feijóo neste "cambio en España", que o seu partido continúe a traballar "desde a unidade" e non só conservar a Xunta nos dous anos que quedan de lexislatura, senón volver gañar en 2024.
Así, animou aos seus e asegurou que "a quinta maioría absoluta empeza hoxe aquí". Os aplausos que o interromperon en varios momentos do discurso foron especialmente intensos cando afirmou a súa intención de seguir sendo o "corredor de fondo" que lle chaman xa algúns medios e reeditar para o PP unha quinta maioría absoluta despois das catro de Feijóo.
Co anuncio desta candidatura, non rompe co pasado, senón todo o contrario. Asegura que "esta é unha etapa nova, pero é de continuidade" e que o PP empeza "un novo futuro".
"Galicia é o noso camiño, en Pontevedra empeza todo e imos seguir xuntos", rematou o seu discurso, antes de que de fondo soase 'Friday I'm In Love', de The Cure, toda unha declaración de intencións do importante deste día para el. Antes da súa chegada ao acto, ás sete da tarde deste venres, soara 'Mi Gran Noche', de Rafael. E previamente, 'Xuntos', de Juan Pardo.
Tres cancións cargadas de simbolismo e contido para unha nova etapa na que, a partir de maio, pasará a ser o novo líder do PP galego, pero tamén presidente da Xunta de Galicia. El, atafegado, como demostrou, recoñeceu que "nunca na miña vida busquei ser o que vou ser agora", momento este no que a voz non lle aguantou a emoción.
Relacionadas:
-
Alfonso Rueda, o 'herdeiro' do legado que deixou Núñez Feijóo en Galicia
Por Alejandro Espiño |
-
Feijóo, Rajoy, Pastor e Rueda arroupan a Rafa Domínguez na súa reelección para presidir o PP local
Por Redacción |
-
Alfonso Rueda avanza unha "nova etapa" en Galicia na que aplicará "o meu propio estilo"
Por Alejandro Espiño |
-
456 compromisarios da provincia participarán no congreso do Partido Popular de Galicia
Por Redacción |
-
VÍDEO.- O 'venres noite' máis emocionante da vida política do "xefe"
Por Mónica Patxot & Natalia Puga |
-
O PP galego celebrará o 21 e 22 de maio en Pontevedra o congreso da sucesión
Por Oskar Viéitez |
-
Alfonso Rueda e Mariano Rajoy manteñen a súa andaina tradicional da Ruta da Pedra e da Auga
Por Redacción |
-
Os 'baróns' do PP achandan o camiño de Rueda tras avalalo como sucesor de Núñez Feijóo
Por Alejandro Espiño |
-
Alfonso Rueda, o relevo 'previsible' de Núñez Feijóo tras trece anos á súa sombra
Por Alejandro Espiño |