A Deputación pon en marcha un plan de 18 millóns de euros para grandes obras en concellos pequenos
Por Natalia Puga
A Deputación de Pontevedra poñerá en marcha un novo plan de actuación dotado con 18 millóns de euros a investir no que resta de mandato para que os concellos de menos de 20.000 habitantes poidan realizar obras de envergadura que, en caso contrario, exceden ás súas posibilidades económicas ou comprometerían todo o seu orzamento anual nunha soa intervención.
A presidenta e o vicepresidente da Deputación, Carmela Silva e César Mosquera, presentaron este luns este novo plan, que se aprobou na Xunta de Goberno do pasado venres e poñerase en marcha xa de forma inmediata, en canto saia publicado no Boletín Oficial da Provincial (BOP). Os concellos terán un mes para presentar os seus proxectos e a idea é que as obras estean licitadas antes de xuño de 2018 e executadas antes de xuño de 2019.
O plan está dividido en tres anos, con seis millóns de investimento cada ano, 2017, 2018 e 2019. Cada concello poderá recibir un máximo de 1,5 millóns de euros nos tres anos e a Deputación financiará un máximo do 80% do total do orzamento do proxecto, sendo necesario que cada municipio soporte o 20% restante.
Está pensado para dar aos concellos a posibilidade de poñer en macha proxectos que xa teñen moi madurados. Así, será requisito fundamental que os proxectos xa estean elaborados e que conten con todos os permisos necesarios para executar a obra. Outro requisito será que o concello non recibise máis de 600.000 euros en proxectos de urbanización ou reurbanización neste mandato.
Este plan está pensado para proxectos como, por exemplo, a construción de auditorios, pavillóns, obras de reurbanización de prazas ou outros similares. Os concellos poden presentaron os que eles consideren e unha comisión evaluadora composta por funcionarios da Deputación determinará cales encaixan e son subvencionables.
Mosquera e Silva sinalaron que ten constancia de que hai concellos que se atopan nesta situación de contar con proxectos moi avanzados que responden a necesidades sociais, pero que non poden asumilos sen comprometer todo o seu orzamento anual e non conseguiron axudas doutras administracións. Non especificaron ningún en concreto, pois descoñecen cales se presentarán e se cumprirán os requisitos.
Relacionadas:
-
A Deputación e PP acúsanse mutuamente de caciquismo
Por Oskar Viéitez |
-
O PP propón á Deputación aumentar a partida do "miniplan" para concellos de menos de 20.000 habitantes
Por Oskar Viéitez |
-
Bueu pedirá á Deputación os fondos para a piscina municipal que non logra da Xunta
Por Redacción |
-
O PP tilda de "improvisado" e "insuficiente" o plan da Deputación de grandes obras para concellos pequenos
Por Natalia Puga |
-
PSOE e BNG sopran as velas do seu segundo ano á fronte do goberno da Deputación
Por Oskar Viéitez & Mónica Patxot |