Revolución en Ponte Sampaio: haberá campo de fútbol novo e duplicarase o tamaño da praia
Por Alejandro Espiño
Ambiciosa e moi potente. Así describiu o portavoz do goberno municipal, Raimundo González, a actuación que o Concello desenvolverá en Ponte Sampaio. Supoñerá un investimento aproximado de 2,5 millóns de euros e permitirá crear novos espazos de lecer, duplicando o tamaño actual da praia fluvial e construíndo un novo campo de fútbol.
A recuperación desta ampla franxa do litoral permitirá acondicionar uns 30.000 metros cadrados no ámbito da Xunqueira de Ponte Sampaio, actuando nun espazo natural que, segundo González, é de "gran valor paisaxístico".
A intención desta actuación é duplicar o espazo de praia do río Verdugo, moi utilizada en época estival, ampliar as zonas verdes e as áreas de xogo infantil e mesmo crear unha pérgola deportiva que, ademais de permitir a práctica de fútbol ou baloncesto, sirva para posibles actuacións e concertos. Ademais, ampliarase o aparcadoiro actual.
Para logralo, o primeiro paso é trasladar o actual campo de fútbol e completar a tramitación ante Costas para desafectar estes terreos. Ambos os trámites xa están en marcha.
Con respecto ao campo, o Concello adquiriu por 122.000 euros unha parcela de case 11.000 metros cadrados, xusto enfronte das instalacións deportivas actuais, para construír nela o novo estadio. Xa se está elaborando o proxecto para a construción deste campo, que será de herba sintética e estará financiado pola Deputación de Pontevedra.
O goberno municipal estima o seu custo en 1,1 millóns de euros, prezo no que se inclúe tamén a derriba do campo vello, que manterá o seu uso deportivo ata que se poida utilizar o novo. O Concello prevé que estea listo en setembro de 2018, a tempo para comezar a tempada deportiva do próximo ano.
A segunda fase destes traballos comezará unha vez se gañe o espazo que deixa libre o campo. Incluirá a ampliación da praia, cuxa zona de baño irá case desde a ponte medieval ata o colexio, e a reordenación do resto dos terreos gañados con novas zonas verdes, xogos infantís e equipamentos polivalentes.
Para estes traballos, o Concello estima un investimento aproximado de 1,4 millóns de euros.
"A remodelación e ampliación deste espazo vai a supoñer un cambio substancial para a parroquia ao recuperar terreos que se perderon no seu momento para uso e goce dos veciños e veciñas", destacou o edil do BNG, que detallou que o Concello leva "un tempo" xestionando este proxecto, que non foi anunciado "ata que tivemos todo pechado".
Relacionadas:
-
A construción do novo campo de fútbol de Ponte Sampaio permitirá recuperar unha zona de ribeira
Por Redacción |
-
Costas desafectará os terreos para ampliar a praia fluvial de Ponte Sampaio
Por Redacción |
-
Avanzan os trámites para a desafectación do campo de fútbol de Ponte Sampaio
Por Redacción |
-
Presentan o proxecto do novo campo de fútbol de Campañó
Por Diego Espiño |
-
Libera propón que Ponte Sampaio se habilite como a primeira praia fluvial de Galicia 'apta con animais'
Por Redacción |
-
O Concello rexeita a desafectación dos terreos da antiga Pontesa
Por Alejandro Espiño |
-
O colexio de Ponte Sampaio intégrase con nenos e maiores da súa contorna
Por Redacción |
-
Ponte Sampaio, primeiro paso para levar iluminación led a todo o rural pontevedrés
Por Redacción |