As cidades integradas na rede Tonucci ven irreversible a recuperación do espazo público
Por Redacción
O encontro da rede española das cidades dos nenos, proxecto impulsa o pedagogo Francesco Tonucci, mantivo este venres en Pontevedra unha xornada de traballo para desenvolver, contrastar e debater os traballos realizados nos diferentes concellos e entidades.
Divididos en tres grupos, o de planificación compartida, xogo e espazo público; consello dos nenos e nenas e autonomía, todos eles concluíron que a recuperación do espazo público é un dereito dos cidadáns, beneficioso para todos os integrantes das cidades.
Neles subliñouse que a filosofía das cidades dos nenos que propón Tonucci -deseñar as cidades baixo o paradigma dos nenos e nenas para que sexan válidas para todos- ten que obrigatoriamente estar respaldada por unha aposta política "valente" na que a prioridade sexa a recuperación do espazo público para as persoas.
Así, a primeira e máis importante conclusión é que a utilización do espazo polos cidadáns é un dereito que se volve irreversible: unha vez que unha área se restrinxe aos vehículos, todos os cidadáns, e particularmente nenos e nenas, benefícianse.
Outra das conclusións asumida por todas as entidades presentes é que é posible recuperar o espazo público en todas as cidades, independentemente do seu tamaño: pequenas vilas ou grandes núcleos, sempre adaptando as fórmulas ás singularidades de cada lugar.
No caso de vilas nas que o modelo xa está implantado nos núcleos urbanos, a aposta é trasladalo, como no caso de Pontevedra, tamén ás zonas do rural.
Outra das conclusións é que é fundamental á hora de redeseñar os espazos contar coa participación da cidadanía -con nenos e nenas como cidadáns con pleno dereito- en cada un dos proxectos e que é preciso xerar espazos de uso compartido e non segregado para a convivencia.
Toda esta filosofía, segundo estas cidades, debe aplicarse dende todas as áreas de goberno, non só o urbanismo, senón tamén a educación, xuventude ou promoción económica, implicando ademais á comunidade educativa.
Finalmente, analizáronse as dificultades para que pais e nais perdan os medos sobre o desenvolvemento de nenos no seu contorno. Por este motivo a principal conclusión foi a necesidade de actuar recuperando o espazo público de forma contundente, tendo en conta a participación das administracións, familias, escolas e comunidades e a sensibilización.
Relacionadas:
-
Ideas urbanas pontevedresas toman camiño de Montpellier
Por Redacción |
-
Pontevedra, premiada pola peonalización do centro histórico
Por Alejandro Espiño |
-
Máis de 7.800 persoas visitaron a mostra sobre Tonucci: 'Imaxinar a Educación. 50 anos con Frato'
Por Redacción |
-
Lores: "As cidades intelixentes son as que fan que as persoas que viven nelas sexan felices"
Por Oskar Viéitez |
-
Mosquera: "Declararse fan de Tonucci e non ter valor para aplicar as súas ideas é o grande perigo que corremos"
Por Mónica Patxot & Oskar Viéitez |
-
O encontro pontevedrés da rede española de "Cidades dos nenos" será o máis longo e concorrido
Por Oskar Viéitez |
-
Tonucci fala dos seus 40 anos con ollos de neno
Por Mónica Patxot |