Dous quilómetros de coches para pedir o arranxo integral da PO-234
Por Redacción
Unha caravana formada por ao redor de 200 turismos, que chegou a ocupar unha extensión de dous quilómetros de estrada, plasmou este domingo o malestar veciñal polo estado en que se atopa a PO-234. Os condutores facendo soar as súas bucinas reivindicaron á Xunta de Galicia que se acometan as obras nesta perigosa estrada autonómica no tramo entre Ponte Caldelas e Augasantas (Cerdedo-Cotobade).
Desta forma, os veciños co apoio do Concello rexeitan que a Consellería de Infraestruturas só teña previsto realizar os traballos de reforma no tramo pertencente ao Concello de Cerdedo-Cotobade.
Ás 12.30, a caravana saía da Casa do Pobo de Laxoso e percorreu o centro da vila ata retornar ao momento de orixe. Non se rexistraron incidentes a pesar da numerosa asistencia de manifestantes chegando a unha cifra de medio milleiro.
Entre os asistentes atopábanse participando cos seus vehículos particulares o alcalde socialista, Andrés Díaz, acompañado polos concelleiros do PSOE, Pilar Couto e Enrique Vidal; ademais doutros integrantes do equipo de goberno como Alfonso Gutiérrez, de AVP e Lito Muíños e Manuel Barreiro, do BNG.
Durante o percorrido comprobaron a necesidade dun arranxo integral da estrada e moi especialmente no tramo das curvas de Laxoso, que conta con escasa visibilidade e con verdín sobre o asfalto, causante de numerosas saídas de vía.
Neste sentido, o alcalde sinalou que a continuidade de Ethel Vázquez á fronte da consellería de Infraestruturas non é unha boa noticia, xa que a tamén titular no anterior goberno da Xunta non chegou a recibir ao rexedor a pesar de solicitar unha entrevista. Andrés Díaz afirma que o 90% dos titulares dos terreos afectados confirmaron a súa disposición para ceder gratuitamente os terreos en canto a Xunta inicie os trámites legais para desenvolver a obra.
Relacionadas:
-
A PO-234, en obras o próximo verán polo tramo de Cotobade; Ponte Caldelas terá que esperar
Por Alejandro Espiño & Mónica Patxot |
-
O alcalde de Ponte Caldelas e a conselleira de Infraestruturas sentarán a falar da PO-234
Por Oskar Viéitez |
-
Andrés Díaz afirma que a Xunta inviste 50 veces máis en Cotobade que en Ponte Caldelas
Por Redacción |
-
Ponte Caldelas invita á conselleira de Infraestruturas a "percorrer o perigoso trazado da PO-234"
Por Redacción |
-
O Concello xa ten os terreos para reformar a PO-234 no treito de Cotobade
Por Redacción |
-
VÍDEO.- Así de perigoso é circular pola PO-234 ao seu paso por Ponte Caldelas
Por Redacción |
-
Unha caravana de coches, novo acto de protesta para reclamar a mellora da PO-234
Por Redacción |
-
Centos de veciños saen á rúa para instar á Xunta a rectificar a "cacicada da PO-234"
Por Redacción |