Tonucci, en Pontevedra: "Os nenos son peóns e nada máis. Se a cidade non é axeitada para os peóns, resultan excluídos"
Francesco Tonucci, o pedagogo italiano que ideou a "cidade dos nenos" -gran inspiración para o modelo urbano de Pontevedra-, está de novo na cidade do Lérez. Pero esta vez, "non veño para falar, senón para estudar", explicou. Acompaña a unha delegación de alcaldes e concelleiros da rexión italiana de Lazio.
Todos eles decidiron visitar Pontevedra, segundo Tonucci, para coñecer o camiño que emprendeu no seu día o goberno municipal para "investir as xerarquías e as prioridades" no uso do espazo urbano, priorizando a mobilidade peonil e ciclista por encima do uso do automóbil particular "e cales foron as súas motivacións para facelo".
Están interesados no proxecto "pero teñen dúbidas", xa que segundo o pedagogo italiano "pensan que se cadra non é posible, que é moi complicado ou que a xente e os comerciantes van estar en contra", pero coa súa presenza en Pontevedra queren comprobar "que foi posible" e analizar como se realizou.
Para Francesco Tonucci, Pontevedra ten unha "vantaxe" con respecto a outras cidades que iniciaron esta mesma liña de traballo e que fixo unha elección "global e coherente", ao non apostar por un espazo "especial" para os peóns, senón por cambiar a cidade enteira, reducindo o tráfico rodado ao "uso por necesidade" e confiando nos seus habitantes.
"Nótase que Pontevedra é distinta e correspóndese ao que nós esperamos e propoñemos desde hai anos, unha cidade para os nenos", sinalou o experto italiano, que mantivo este mércores unha reunión con técnicos municipais para que a comitiva transalpina comece a familiarizarse coa filosofía do modelo urbano pontevedrés.
Neste sentido, Tonucci destacou que en Pontevedra "respéctase aos peóns", aos que se lles consideran os "donos" da cidade e outórgaselles prioridade en todos os espazos públicos. Así, lembrou que "o peón máis peón é o neno" e mentres que os adultos "ás veces conducimos", os máis pequenos "son peóns e nada máis", polo que subliñou que unha cidade que "non é adecuada" para os peóns "exclúeos".
A delegación italiana, tras ser recibida polo alcalde de Pontevedra, Miguel Anxo Fernández Lores, realizou tamén este mércores unha visita a pé pola cidade para comprobar o resultado da reforma urbana.
Ademais, nas próximas horas tamén está previsto que os alcaldes e concelleiros italianos comproben o funcionamento dos camiños escolares, postos en marcha para potenciar a autonomía dos nenos e que poidan ir andando sós ao colexio, así como os esforzos pola creación de núcleos de centralidade parroquial no rural.
Relacionadas:
-
Pontevedra converterase na "Provincia Tonucci"
Por Oskar Viéitez & Mónica Patxot |
-
O Pazo da Cultura acollerá a exposición 'Imaxinar a educación. 50 anos con Frato'
Por Oskar Viéitez |
-
Pontevedra, na boca de todos
Por Redacción |
-
Pontevedra porá en valor a 'cidade 30' co gallo do Día mundial contra a violencia viaria
Por Redacción |
-
O programa Camiños Escolares pega un salto para abandonar o seu "estancamento"
Por Oskar Viéitez |
-
Pontevedra, referencia para os municipios españois na redución da velocidade nas cidades
Por Redacción |
-
Pontevedra preside esta semana en Torrelodones o Congreso das Cidades que Camiñan
Por Redacción |
-
O modelo urbano de Pontevedra interesa a Vilanova de Famaliçao
Por Alejandro Espiño & Mónica Patxot |
-
Tonucci revisa os Camiños Escolares e suxire algúns cambios na iniciativa
Por Alejandro Espiño & Mónica Patxot |
-
O Concello recibe a Tonucci á fronte dunha delegación italiana
Por Redacción |
-
A rexión chinesa que inspirou "Avatar" quere irmandarse con Pontevedra
Por Alejandro Espiño |
-
Tonucci: "Hai que pensar a mobilidade doutra maneira e niso en Pontevedra son os mestres"
Por Redacción |