Os paraísos artificiais impóñense en Debut 2015
Por Diego Torrado
'Artificial Paradises', unha colección na que cada estilismo representa unha paisaxe imaxinaria, converteuse na noite deste xoves na gañadora do desfile Debut 2015, celebrado no recinto feiral de Pontevedra e que levou enriba da pasarela as propostas do alumnado da Escola de Deseño e Moda de Galicia (Esdemga).
O xurado seleccionou a proposta dunha pontevedresa, Sheila Pazos, que en 'Artificial Paradises' se inspirou no libro As cidades invisibles, de Italo Calvino. Titulada en Belas Artes e alumna de doutoramento desta facultade do campus pontevedrés, Pazos recoñece, en declaracións ao Duvi da Universidade de Vigo, que as "paisaxes imaxinarias" constitúen un tema "no que traballo a miúdo a nivel artístico, e nesta ocasión leveino á moda". Esta inspiración que ten a súa orixe como filla de emigrantes pontevedreses en Suiza, valeulle un premio dotado con 2.000 euros que entrega a empresa Jesús Peiró.
O segundo premio foi para o proxecto 'No te mueras cariño' de Paula Sobrino, basado nun libro de relatos no que Marco Polo narra as súas viaxes ao emperador Kublai Khan.
A novena edición do desfile de Esdemga volveu congregar máis dun milleiro de persoas no Pazo da Cultura, entre eles unha nutrida representación do sector téxtil galego. A directora de Edemga, Lola Dopico, destaca que o desfile supón, ante todo "un proxecto formativo e educativo, que xorde do traballo do estudantado nas aulas".
Sobre a pasarela estiveron os traballos realizados por estudantes de diferentes cursos e os proxectos de fin de estudos de sete novos egresados, Ana Abal, Lucía Caride, Javier Eijo, Laura Rodríguez, Carmela Sánchez e as premiadas Pazos e Sobrino. Foron un total de 42 proxectos e coleccións que levaron sobre a pasrela a máis de 60 persoas que exerceron como modelos.
Debut incluíu a posta en escena de Human 2.0, a colección deseñada por un grupo de alumnas e egresadas coa que Esdemga lograba a comezos do presente ano o primeiro premio no Certame Nacional de Escolas de Moda Talento & Co, promovido pola plataforma Trendipia co soporte de Inditex. Pilar Ullod, Raquel Chapela, Tatiana Rico, Carlota Pérez e Paula Sobrino son as cinco autoras dun proxecto que obtivo un galardón de 50.000 euros e que nesta xornada puido verse por primeira vez enriba dunha pasarela.
Relacionadas:
-
Sheila Pazos, de gañadora en Debut a finalista do certame International Talent Support
Por Redacción |
-
A estudante de moda Sheila Pazos viaxa cos seus "Paraísos artificiais" á Madrid Fashion Week
Por Redacción |
-
Quero a mochila Human 2.0
Por Marisa Ciordia |
-
Os alumnos de Deseño e Moda buscan modelos para o seu Debut
Por Redacción |