Dubái 'coroa' o modelo urbano de Pontevedra co premio ONU-Hábitat
Por Alejandro Espiño
Cansado tras tres días de intensa actividade, pero visiblemente emocionado. Así se mostraba este martes Miguel Anxo Fernández Lores, tras recibir o premio que Dubái lle fixo entrega por un modelo urbano "que fixemos entre todos os pontevedreses". Este premio ONU-Hábitat supón o maior recoñecemento internacional que recibiu Pontevedra, "un premio mundial por unha cidade amable e agradable", destacou o alcalde.
Apenas eran as dez e media da mañá -sete e media en España- cando comezaba a cerimonia de entrega destes premios ONU-Hábitat. A delegación Pontevedra, ao igual que o resto dos premiados, levaban xa un par de horas no auditorio da Asociación Cultural e Científica de Dubái, situada en Al Mamzar. Había que preparar o protocolo, porque aquí nada se deixa á improvisación, especialmente cando o acto o presiden as autoridades locais.
E así, ofreceron unha cerimonia brillante e na que non faltou detalle algún e coa que Dubái quería demostrar o ben que se lles dá organizar eventos deste tipo.
Cunha puntualidade case británica e con todo o público posto de pé, soaba o himno nacional dos Emiratos Árabes. Daba así inicio unha gala na que, tras o obrigado rezo do Corán, tomaba a palabra Hussain Nasser Lootah, director xeral da municipalidade de Dubái, institución que organiza estes premios dende 1996. Foi un discurso en árabe, no que dixo que os galardoados "cambiaron para mellor as vidas das súas respectivas sociedades".
Ao igual que o voceiro de ONU-Hábitat -que falou a continuación-, Hussain Nasser Lootah destacou que Dubái e as Nacións Unidas recibiron de novo propostas chegadas dende todos os continentes "que nos axudan a concibir un mundo mellor para todos". E é que, tal e como sinalaron, "non hai proxectos pequenos, todos contribúen a conseguir o futuro que queremos, no que se garantan as boas prácticas en materia ambiental,".
Tras a proxección dun video no que se resumían todas as iniciativas premiadas, foi a quenda da entrega o premio a Pontevedra. O galardón de ONU-Hábitat representa un 'barjil' de ouro. Trátase dunha réplica dun antigo sistema de aire acondicionado que tiñan as casas dubaitíes para minorar a calor do deserto. Con el, reflicten o marcado carácter medio ambiental que ten o recoñecemento que recibiu a cidade.
O alcalde explicou que este recoñecemento "nos anima a seguir traballando de cara ao futuro, dar pasos adiante e seguir avanzando" no modelo de cidade
Miguel Anxo Fernández Lores como alcalde da 'medina' de Pontevedra -como así se referiron a el dende o estrado- subiu a recollelo acompañado do intendente xefe da Policía Local, Daniel Macenlle. Tamén se lles fixo entrega do diploma acreditativo do premio e do cheque por valor de 30.000 dólares que o Concello de Pontevedra, tal e como se anunciara previamente, destinará case na súa totalidade á Rede Axuda.
Despois de que abandonasen o auditorio as autoridades locais, fortemente custodiadas por numeroso persoal de seguridade para evitar que ninguén se achegase a eles, un Fernández Lores máis tranquilo mostrou o seu "orgullo e satisfacción lexítimo" por este premio a Pontevedra, unha cidade "feita para os veciños e veciñas". Un recoñecemento, subliñou, "que nos dá folgos para facer o moito que nos queda por facer".
O alcalde explicou que este recoñecemento por parte da comunidade internacional "nos anima a seguir traballando de cara ao futuro, dar pasos adiante e seguir avanzando" en relación a un modelo de cidade "cohesionada" na que, apuntou, "merece a pena traballar vivir e disfrutar dela nas mellores condicións ambientais posibles e todo feito con sentidiño común e o apoio de moita xente".
E é que unha cousa ten clara o Concello de Pontevedra, sinalou Miguel Anxo Fernández Lores. Este proxecto urbano non tería sido posible sen a colaboración e a implicación de toda a sociedade pontevedresa. Por iso, expresou o seu desexo de que todos os cidadáns "reciban este premio con orgullo, como o recibe o seu alcalde e coa satisfacción do traballo ben feito", algo que espera que eleve a autoestima dos pontevedreses, "que nos fai falta nestes momentos".
Relacionadas:
-
Lores presumirá de modelo de cidade en Guimaraes
Por Redacción |
-
De Dubái a Hong Kong, premios para unha Pontevedra convertida en referente
Por Redacción |
-
Dubái, Nova York e Hong Kong, premios para unha Pontevedra convertida en referente
Por Redacción |
-
Pontevedra, a Hong Kong para recibir en novembro un novo premio internacional
Por Alejandro Espiño |
-
O modelo urbano de Pontevedra dá o salto a Nova York cun novo premio internacional
Por Alejandro Espiño |
-
Lores: "O PP leva moi mal que Pontevedra se posicione a nivel internacional e que nos dean premios"
Por Alejandro Espiño | Creada e actualizada
-
A sociedade pontevedresa brinda polo premio ONU-Hábitat entregado en Dubái ao modelo urbano
Por Alejandro Espiño & Mónica Patxot |
-
Redeaxuda destina os fondos do ONU-Hábitat a gasto farmacéutico e a atención ás familias
Por Oskar Viéitez |
-
Un acto público e unha festa chea de música e animación para brindar polo premio ONU-Hábitat
Por Alejandro Espiño |
-
Dous días de celebración para compartir o premio ONU-Hábitat cos pontevedreses
Por Redacción |
-
Javi Gómez Noya inicia a súa tempada en Dubái co reto de ser o 'home do millón de dólares'
Por Alejandro Espiño |
-
Pontevedra exhibe o seu modelo urbano en Dubái ante a comunidade internacional
Por Alejandro Espiño |
-
"O de Pontevedra parecía unha utopía para calquera cidade. ÿ fantástico ver que se pode facer realidade"
Por Alejandro Espiño |