Pontevedra, campo de probas para un proxecto de nanosatélites auspiciado pola ONU
Por Alejandro Espiño
Poñer a enxeñaría aeroespacial ao servizo de causas humanitarias. ÿ o obxectivo do proxecto que coordina a Universidade de Vigo e que, auspiciado pola ONU e a Axencia Espacial Europa, pretende formar unha "constelación" de nanosatélites que permita axudar ao desenvolvemento dos países máis desfavorecidos. E o Concello de Pontevedra será o campo de probas para comprobar o funcionamento deste sistema de comunicación.
Será posible grazas a un convenio polo cal Pontevedra investirá 36.000 euros para colaborar con este grupo de investigación aeroespacial da Universidade de Vigo. En concreto, os seus responsables comprobarán neste municipio a capacidade que teñen eses nanosatélites para obter datos dalgúns dos parámetros máis demandados a nivel mundial, como a calidade das augas ou o estado dos montes.
Así o explicou o profesor Fernando Aguado tras a firma deste acordo, que contribúe a avalar unha investigación "estratéxica" da universidade e onde este centro educativo é xa unha referencia a nivel europeo, segundo o seu reitor, Salustiano Mato. Ambos os dous destacaron que, coa axuda de Pontevedra, se poñerá en marcha un proxecto independente, pero paralelo ao iniciado hai un ano co lanzamento do Humsat-D, o primeiro dos satélites desta rede.
Instalaranse sensores en diferentes puntos do municipio para transmitir a estes nanosatélites datos sobre o caudal e turbidez dos ríos, o estrés hídrico ou o grao de humidade nos montes e zonas agrícolas, grazas, neste caso, a dispositivos soterrados. Todo iso permitirá ao Concello "coñecer dunha forma rápida e automática ou estado da calidade das augas dos nosos ríos e previr incendios forestais", destacou o alcalde, Miguel Anxo Fernández Lores.
Tamén será moi útil para a Universidade, xa que permitirá aos seus investigadores realizar unha serie de "probas concepto" e comprobar sobre o terreo a utilidade destes satélites para a detección e análise da calidade das augas en todo o mundo. Nas próximas semanas, os responsables do proxecto poñeranse en contacto cos técnicos municipais para colocar eses sensores e poder comezar coas primeiras probas antes de rematar o ano.
Está previsto que entre sete e nove satélites conformen esta constelación Humsat que será probada en Pontevedra, e que ten un custo de lanzamento e posto en órbita "ata cen veces inferior" que os grandes satélites, sinalou Fernando Aguado. O propio centro vigués lanzará un novo satélite o próximo ano. Recibirá o nome de FemtoXat e terá como misión "actuar como repetidor desta nube de satélites".
Ademais, en virtude deste convenio, realizaranse unha serie de actividades divulgativas como conferencias, charlas ou proxeccións, dirixidas ao público en xeral, e aos centros educativos da cidade, xa que estas probas que se van realizar cos sensores darán como froito "demostracións moi visuais" que permitirán mostrar aos cidadáns que "o mundo do espazo é algo que teñen moi preto".
Relacionadas:
-
O satélite Humsat xa recolle datos sobre ruído e contaminación dos sensores instalados en Pontevedra
Por Redacción |
-
Instalados os nanosatélites da Universidade de Vigo para medir a calidade do aire de Pontevedra
Por Alejandro Espiño |
-
Campolongo prepárase para acoller a estación de control de calidade do aire
Por Redacción |
-
A que cheira Pontevedra?
Por Oskar Viéitez |
-
Marte e Pontevedra, máis preto que nunca grazas o enxeñeiro da NASA Fernando Abilleira
Por Redacción |
-
Pontevedra probará nanosatélites para controlar en tempo real o estado dos seus ríos
Por Alejandro Espiño |