O colectivo Masa Crítica recibirá o premio á mobilidade na Bicifeira desta fin de semana
Por Redacción
A segunda edición de Bicifeira chega esta fin de semana do 17 e 18 de maio á Praza de España como o prato estrela da programación de Pontenbici a través dunha exposición comercial na que se mostrarán bicicletas novas e antigas. As actividades que se ofertan dentro desta cita de promoción da bicicleta contempla exhibicións de cars a pedais e de skater na avenida de Monteiro Ríos. E o edificio do Concello acollerá un espazo audiovisual, ademais de charlas eobradoiros.
As actividades iniciaranse o sábado ás 11.30 horas coa entrega do Premio de Mobilidade Ciclista ao colectivo Masa Crítica. Este mediodía, o concelleiro de transportes, Miguel Filgueira, anunciaba que o premio se concede a este grupo formado por oito persoas en Pontevedra porque "loitan polo uso da bici, colaboran á hora de organizar proxectos con estes vehículos, dan suxerencias e fan críticas construtivas de todo aquelo que teña que ver co mundo da bicicleta".
Dentro das propostas desta feira ofrécese unha dieta cardiosaludable a través de produtos do mundo do pan e de xeados naturais elaborados con froita.
As charlas e talleres que se desenvolverán no edificio do Concello serán os seguintes:
SÁBADO 17
- 12.00 h. Mobilidade alternativa
- 17.00 h. Turismo deportivo, que ofrecerá o blogueiro Ángel Pérez, un ciclista valenciano que no seu blog 'Dos pedales, mil caminos' ofrece rutas pola provincia.
- 19.00 h. A familia Supertramp (a volta a Europa en Trike).
DOMINGO 18
- 12.00 h. Obradoiro sobre mecánica básica e ergometría da bici, a cargo de Bibiana Casares, para aprender aspectos fundamentais para arranxar unha cadea e parchear ou cambiar unha roda.
Masa Crítica organiza tamén unha marcha nocturna durante a noite do sábado, a partir das 22.00 horas, cun percorrido urbano que partirá da Praza de España, no que se repartirán mil chalecos reflectantes nos que se recorda que para adiantar un ciclista, os automóbiles teñen que manter unha separación mínima dun metro e medio. Quique Pérez, representante do colectivo, indicou que o problema fundamental co que se encontran os ciclistas é a falta de respecto por parte dos condutores: "a maioría saben a norma pero deciden incumprila".