Sergio Vega sobe posicións na xeral da Copa España tras ser segundo en Torredonjimeno
Por Redacción
Rozou o triunfo o Grupo Deportivo Supermercados Froiz na quinta proba puntuable da Copa de España Elite e Sub-23, a Clásica de Torredonjimeno, tras a suspensión a semana anterior do Memorial Valenciaga.
Sergio Vega foi segundo na liña de meta a só 2 segundos nunha trepidante carreira e sobe posicións na xeral confirmándose como gran baza do equipo alimenticio na competición. Vega é agora sétimo con 290 puntos no ecuador da Copa, a menos de 100 do líder, Antonio Soto (Lizarte) que acumula 384 puntos.
O Froiz realizou un notable traballo en Torredonjimeno na cabeza do pelotón e atento aos constantes cortes nunha carreira que se seleccionou nas ascensións ao Alto de Locubín, que Sergio Vega coroou na cabeza, e o Alto de Valdepeñas.
O descenso e a posterior escalada a Valdepeñas de Xaén terminaron de dar forma ao grupo de 20 ciclistas de cabeza que pelexaron ata o final a vitoria. Despois de varios ataques o representante do Froiz quedou nun pequeno grupo perseguidor a 30 segundos nos últimos 15 quilómetros, pero tras unha persecución a ritmo intenso enlazaron coa meta xa no horizonte, unha fusión dos dous grupos que se produciu con Antonio Gómez cuns metros de vantaxe que lle serviron para facerse co triunfo.
O botín do Froiz nesta proba completouse coa vitoria na xeral da montaña para o propio Sergio Vega e o cuarto posto por equipos.
A próxima cita da Copa de España será o Memorial Pascual Momparler o próximo 22 de abril en Villanueva de Castellón.
Relacionadas:
-
O Froiz volve liderar o ránking nacional catro anos despois
Por Redacción |
-
A Sergio Vega sóbranlle dous quilómetros na Clásica Xavi Tondo
Por Redacción |
-
O Froiz quere achegarse ao amarelo da Copa España no Memorial Pascual Momparler
Por Redacción |
-
Xornadas de probas biomecánicas no Froiz
Por Redacción |
-
Iván Martínez logra en Zamora a primeira vitoria da tempada para o Froiz
Por Redacción |
-
Sergio Vega, noveno no Trofeo Guerrita, confírmase como primeira opción do Froiz na Copa de España
Por Redacción |