Actuación destacada de Silvia Aguete con España no Torneo IV Nacións
Por Redacción
España proclamouse campioa do Torneo IV Nacións de fútbol sala feminino disputado en Guadalajara, unha competición na que gozou de gran protagonismo Silvia Aguete.
A gardameta pontevedresa do Poio Pescamar foi titular en dous dos tres encontros co equipo absoluto de España, callando unha notable actuación e consolidándose nos plans da seleccionadora nacional, Alicia Morell.
Silvia foi parte do quinteto inicial no primeiro encontro ante o que se presentaba como rival a bater, Rusia, nun partido que se decidiu por un axustado 2-1.
Na segunda xornada do Torneo o rival foi Italia, con triunfo por 3-0 e sen a xogadora do Poio Pescamar entre as titulares, condición que recuperou no duelo que decidiría o campión, ante Portugal. Valíalle un empate a España para facerse co título, pero impúxose por 4 goles a 2 nun choque no que sempre dominou o marcador.
Tras a súa participación coa Selección Española, Silvia Aguete volve agora á disciplina do seu club, que retomará a competición na Primeira División a próxima fin de semana recibindo na Seca ao cuarto clasificado, o AD Alcorcón.