O Pontevedra freta un autobús para que os seus afeccionados acompañen o equipo en Redondela
Por Redacción
Custoulle ao Pontevedra chegar ao liderado da Terceira División e está disposto a defendelo con uñas e dentes.
O primeiro paso nesa defensa será un esixente choque ante un dos equipos revelación da tempada, un Club Deportivo Choco que marcha terceiro na clasificación a só un punto dos granates.
Conscientes da importancia do apoio da afección, o club lerezano decidiu fretar un autobús para que os seus seguidores poidan acudir ao Campo Municipal Santa Mariña de Rendondela (domingo 30 ás 17:00 horas) para animar os seus.
O custo da viaxe en autocar é de cinco euros, ao que hai que sumar o prezo da entrada, que poderá adquirirse na billeteira do estadio.
O Choco fixou estas entradas en 10 euros para o público xeral e de 5 euros para os menores entre 12 e 17 anos. Os nenos de menos de 12 anos poderán entrar de balde.
Para anotarse no desprazamento organizado hai que acudir ás oficinas do Pontevedra, no Estadio Municipal de Pasarón, de 9:00 a 14:00 e de 16:00 a 19:00 horas ata o xoves ou a mañá do venres, de 9:00 a 14:00 horas.