O Teucro proclámase campión da Copa Galicia tras vencer o Cangas nos penaltis
Por Redacción
A Sociedad Deportiva Teucro proclamouse este domingo en Tui campión da Copa Galicia de Balonmán tras impoñerse ao Cangas nunha emocionante final.
Os pontevedreses realizaron un grande encontro, sen perder a cara ao choque cando os cangueses se distanciaron no primeiro período. A reacción teucrista antes do descanso permitiu irse aos vestiarios dous goles por debaixo no electrónico (14-16).
Na reanudación as tornas cambiaron, cos de Quique Domínguez máis entoados para, grazas a unha boa defensa e a actuación de Amérigo en portaría, poñer tres goles de vantaxe (24-21).
No tramo final do encontro o Cangas devolveu a igualada ao marcador, e aínda que contou coa última posesión, o equipo do Morrazo non estivo acertado e a Copa Galicia tivo que decidirse por penaltis (31-31).
Dende os sete metros os azuis estiveron máis acertados para lograr un triunfo que reforza o seu traballo de pretempada e lles sitúa nunha boa posición de cara ao inicio de liga. Por ese motivo o preparador teucrista recoñeceu estar "muy satisfecho con el trabajo de todo el equipo", aínda que o resultado a estas alturas, asegura, "tiene muy poca relevancia".
Para alzar a copa, o Teucro tivo que desahacerse nas roldas previas do Balonmán Pontevedra, o Xiria de Carballo e o Balonmán Lalín, ao cal venceu por un claro 24-37 na semifinal disputada este sábado.
Relacionadas:
-
Adrián Pumar preséntase oficialmente nun Teucro que recupera efectivos
Por Diego Espiño |
-
Carlos García, con molestias aínda no xeonllo, confía en iniciar a tempada co Teucro en plena forma
Por Redacción |
-
Amenabar Zarautz, primeiro escollo para o Teucro na Copa do Rei de balonmán
Por Redacción |
-
O ABC Braga lévase o triangular Cidade de Pontevedra tras gañar o Teucro e o Xiria
Por Redacción |
-
O Teucro avanza a semifinais da Copa Galicia tras vencer o Xiria (19-27)
Por Redacción |