'Na beira do río. Diálogos na pintura' con Dolores Gálvez e Belén Padrón
Por Redacción
Pode servir a pintura como xeito de encontro entre diferentes xeracións? E por que non? A experiencia establécese a partir dese enfrontamento, da construción dun diálogo artellado dende as propostas individuais de dous artistas que xorden en épocas diferentes, con formacións e situacións vitais alonxadas entre si, respondendo, polo tanto, a diferentes inquedanzas e paisaxes sociais.
Estamos ante un diálogo dende os pinceis, dende o xeito de mirar á nosa sociedade e interpretala a través desa disciplina que é a pintura.
A sala de exposicións do Pazo da Cultura abriu a nova exposición de Na beira do río. Diálogos dende a pintura. Para esta segunda edición a proposta invita a interactuar a Dolores Gálvez (Poio, 1954) e Belén Padrón (Oviedo, 1981). Ambas levan vivindo en Pontevedra dende ben novas, ademais de realizar os seus estudos de Belas Artes na facultade da nosa cidade.
A obra de ambas creadoras configúrase no terreo da abstracción o que pretende ser unha aposta máis dentro deste proxecto pictórico dentro dos infinitos vieiros da pintura. As dúas traballan dende a potencia da cor e a súa plasticidade dentro dun discurso singular.