Cinco curtametraxes europeas pechan as proxeccións da sétima edición do FIC Bueu
Por Redacción
Cinco curtametraxes europeas porán fin este venres ás sesións da sétima edición do Festival Internacional de Curtametraxes de Bueu. Unha delas será a do realizador Fran Estévez, un vilagarcián afincado en Pontevedra que presentará na derradeira xornada de proxeccións o filme Idiotas, protagonizado por un mozo con discapacidade intelectual, Manuel Rey, que tamén podería achegarse ata o Centro Social do Mar.
Canda a produción galega, pasaranse Luminita (Portugal/Romanía), de André Marques, e a comedia The World (España), dirixida por Daniel Remón. Seguiranlle a cinta de animación La maison de Poussière (Francia), de Jean-Claude Rozec, e Uten deg (Noruega), do realizador Marius Myrmel. As sesións comezan ás 20.00 e ás 22.00 horas, con entrada de balde.
Todas elas foron precedidas deste xoves pola outra cinta galega a concurso, 3-1=0, de Juan Galiñanes ou pola austríaca Für tot Erklärt (Declarado morto), dirixida por Arne Nostitz-Rieneck.
O cinema francés volveu estar presente da man de Genden Punstok e a súa curta La lampe au beurre de Yak (A lámpada de manteiga de Yak), á que seguiu Un lugar mejor, dos españois Marisa Crespo e Moisés Romera. A estadounidense Me + her (Eu + ela), de Joseph Oxford, e a suíza Parvaneh, de Talkhon Hamzavi, pecharon o cuarto día do festival.
O festival rematará este sábado co encontro entre directores galegos e internacionais para debater sobre cine e coa entrega de premios ás mellores curtametraxes.