O PSOE denuncia que a Xunta non contempla o cambio da cuberta do colexio Froebel nos orzamentos
Por Mónica Patxot & Anxo Lourido
Non hai partida nos orzamentos do 2024 da Xunta para acometer a terceira fase das obras do CEIP Froebel de Pontevedra, un centro que permanentemente se ve afectado pola entrada de auga no seu interior cando se producen choivas intensas.
Manuel Fariña, responsable da área de Educación do grupo municipal socialista, e Eva Lourenco, presidenta da ANPA Pardo Bazán, do CEIP Froebel, denunciaban esta situación durante a mañá deste martes 21 de novembro.
Lembran que durante as semanas de temporal en outubro, as filtracións de auga volveron producirse no patio interior do centro escolar e nos corredores. Os profesores tiveron que instalar cubos para recoller a auga, a pesar de que durante este verán foron acometidos traballos de limpeza por parte das brigadas municipais no tellado e a consellería de Educación realizou reparacións na cuberta para impedir que se repetisen as escenas de invernos anteriores.
Lembran que en decembro de 2022, a nai de dous alumnos caía nun corredor fracturándose unha man debido a presenza de auga no chan e alertan de que existe un perigo para a comunidade escolar.
Manuel Fariña anunciaba que o grupo municipal do PSOE presentará no próximo pleno municipal unha moción en que solicitarán ao goberno local que inste á consellería de Educación a que leve a cabo a reforma recollida nos termos de 2010; que o Concello colabore na reforma; e, por último, que se constitúa unha mesa de diálogo para realizar un seguimento do proxecto das reformas no que figuren representantes do Concello, da Xunta de Galicia e da comunidade educativa do Froebel.
O concelleiro socialista reclamaba o apoio do PP a esta moción pedindo que teñan en conta os intereses da cidadanía e eviten "a situación de insalubridade e perigo permanente" que se dá no centro, alerta Fariña.
Eva Lourenco explicou que as obras executadas durante este verán foron un parche provisional, insuficiente para evitar as filtracións que afectan á zona que é utilizada como espazo de recreo e para realizar ximnasia.
"Todo o que é o torreón do Froebel continúa sen arranxarse: aí non fixeron nada e é onde os rapaces teñen o seu proxecto de radio, polo que non poden destapar todo o equipamento que mercaron", explicaba a representante dos proxenitores do alumnado. "A torre non a queren arranxar, porque a Xefatura di que é problema do Concello, e o Concello que é problema de Xefatura... É cousa dos dous, un non mantén e outro non fai a reforma, pero os dous están incumprindo. O ano pasado fixeron fotos do tellado e había un xardín. Pero en todo caso, a auga seguirá entrando mentres non se arranxe a cuberta", engadía Lourenco, preocupada pola situación.
Demanda tamén esa partida económica específica nos orzamentos autonómicos de 2024 para que na primavera comece a obra de renovación da cuberta do centro, como prometera o xefe territorial de Educación, César Pérez Ares, que anunciara o inicio dos traballos coa reforma de Infantil para evitar o traslado destes escolares. A continuación, segundo a previsión da consellería, afrontarían as partes de Primaria e a do piso superior, buscando unha solución similar á utilizada para as obras do IES Valei Inclán coa instalación de módulos durante as obras.
"Esa foi a promesa de César e da arquitecta, pero agora atopámonos con que nos din que non hai proxecto", lamentábase a presidenta da ANPA.
270 familias teñen escolarizados aos seus menores no CEIP Froebel e desde o ANPA alertan que se non reciben unha resposta por parte de Educación no prazo de dúas semanas, as familias adoptarán medidas de presión.
Relacionadas:
-
Novo 'Mércores Negro' no CEIP Froebel para esixir á Xunta confirmación por escrito da execución da reforma en 2024
Por Mónica Patxot & Anxo Lourido |
-
A reforma do colexio Froebel, segundo Educación, comezará este mesmo ano
Por Redacción |
-
BNG e PSOE rexeitan unir arquivo e biblioteca en San Francisco porque "non caben"
Por Alejandro Espiño |
-
A Xunta anuncia novas obras no CEIP Froebel, EEI Concepción Crespo Rivas, IES A Xunqueira II e Frei Martín Sarmiento
Por Redacción |
-
O PSOE pide á Xunta que inclúa nos orzamentos 21 propostas para Pontevedra por máis de 36 millóns de euros
Por Oskar Viéitez & Mónica Patxot |
-
Volve entrar auga no interior do colexio Froebel, tras un verán de obras no tellado
Por Anxo Lourido |
-
Inician a renovación das cubertas e canlóns do CEIP Froebel
Por Anxo Lourido |
-
O mantemento dos colexios públicos comeza coa limpeza da cuberta do Froebel
Por Redacción |
-
É unha piscina? Non, é unha nova inundación no patio interior do colexio Froebel tras as fortes chuvias
Por Anxo Lourido |
-
O Concello lembra á Xunta que a reforma do Froebel téñena paralizada desde o 2011
Por Manu Otero |
-
A Xunta revisará o proxecto da reforma do colexio Froebel para acometer unha rehabilitación maior da prevista
Por Oskar Viéitez |