![](/web/cache/scene/uploads/fotos/foto/1d8/_S7QytKoutjK3UsovKMnMzytWsi62MjawUqrKz891Lsov0DGzMN_/_AxNjDQSU7NK0kt0snNTEnJSVWyrgUA_/654dcb1632-003.jpg)
© Xunta de Galicia
A Xunta indica a representantes municipais que o recurso do Estado contra a Lei do Litoral afecta a un 15% do contido
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/9b4/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/654dcabd6b-002.jpg)
© Xunta de Galicia
![](/web/cache/scene/uploads/fotos/foto/9e3/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/654dcb3a02-001.jpg)
© Xunta de Galicia
Ángeles Vázquez, vicepresidenta segunda e conselleira de Medio Ambiente, Territorio e Vivenda e Alfonso Villares, conselleiro do Mar, participaron nun encontro informativo en Pontevedra sobre a norma autonómica durante a tarde deste xoves para trasladar a representantes municipais de municipios costeiros da provincia que o recurso presentado polo Goberno central ante o Tribunal Constitucional contra a Lei de Ordenación e xestión integrada do Litoral, elaborada pola Xunta de Galicia, só afecta ao 15,5% do seu contido.
Segundo figura no Boletín Oficial do Estado, explicou Vázquez, o recurso céntrase en 73 apartados e letras dos 469 que contén a lei. A conselleira avanzou que o Goberno central magnificara o impacto do recurso e, pola contra, numerosos artigos non son impugnados na súa totalidade, senón nunha pequena parte ou nun punto.
En todo caso, a representante da Xunta de Galicia mantivo en Pontevedra que o recurso supón un gran prexuízo para o tecido produtivo do litoral e para os Concellos ao quedar paralizadas todas as solicitudes recibidas desde a súa aprobación para poñer en marcha servizos esenciais no dominio público marítimo-terrestre.
Ángeles Vázquez incide en que a Lei do Litoral é a ferramenta axeitada para protexer a costa galega e anunciou que a administración autonómica permanece á espera para coñecer o contido do recurso e o ditame do Consello de Estado no que está baseado para presentar a defensa dos intereses da comunidade autónoma.
Alfonso Villares, pola súa banda, mantivo a defensa da constitucionalidade da norma e insistiu en que a Lei do Litoral pretende achegar seguridade xurídica á franxa costeira e á cadea mar-industria, que xera máis de 40.000 postos de traballo en Galicia.