A Deputación deixa sen cartos os anteriores plans de compostaxe e mobilidade do BNG
Por Oskar Viéitez
O portavoz do BNG na Deputación, César Mosquera, acusou este xoves ao novo goberno provincial de eliminar os plans Ágora de Mobilidade e o Revitaliza de residuos "deixándoos vexetar sen cartos e sen impulso".
Segundo desvelou o exvicepresidente da Deputación nunha rolda de prensa, a modificación de crédito que se aprobará este venres no Pleno provincial destinará "ata o último céntimo" dos case 2,3 millóns de euros dispoñibles en ambos proxectos a outras actuacións, entre elas o Plan de Infraestruturas Deportivas.
Ademáis, no caso do Revitaliza tampouco se cubriu a baixa por xubilación do director do programa, Carlos Pérez.
"Cárganse os dous programas máis exitosos que había cos concellos", lamentou Mosquera sobre estes plans da Deputación "recoñecidos externa e internamente" e que "funcionaban sen grandes problemas e tiñan éxito e aceptación administrativa e social".
"É unha realidade que non logro entender", manifestou Mosquera.
O portavoz do Bloque na Deputación subliñou que "non hai posible xustificación" para retirar o financiamento a ambos programas, e deixar aos concellos este ano sen as axudas para a redacción de proxectos de mobilidade e as axudas para compostaxe.
"Vese que triunfou a liña da Executiva do PP que quería opoñerse e rebentar isto, e que tiña o seu símbolo máis claro en Domínguez subido ao composteiro coa picacha", dixo o deputado do BNG en referencia ao actual vicepresidente Rafa Domínguez.
Recoñeceu que a eliminación de ambos programas "non é algo tan bruto como a paralización do Museo, pero quitan o financiamento e deixan que esmorezan", rematou.
Relacionadas:
-
Sogama perfílase como primeira opción para tratar os residuos orgánicos da provincia
Por Mónica Patxot & Oskar Viéitez & Redacción |
-
Bodegas Martín Códax obtén 600.000 euros da Deputación para implantar a agrocompostaxe
Por Oskar Viéitez |
-
O Pleno da Deputación aproba unha modificación de crédito para lanzar o plan provincial de infraestruturas deportivas
Por Oskar Viéitez & Mónica Patxot |
-
O BNG fai un balance negativo dos primeiros cen días do novo goberno da Deputación
Por Oskar Viéitez |
-
Mosquera dubida de que neste mandato a Deputación faga "algo" en Santa Clara
Por Oskar Viéitez |