Falsifica as notas do seu fillo para poder optar a unha bolsa universitaria en Estados Unidos
Por Redacción
Unha muller de 50 anos está a ser investigada pola Garda Civil por falsificar o boletín de notas do seu fillo para que este puidese optar a unha bolsa que lle permitise cursar estudos universitarios en Estados Unidos.
A esta muller, veciña de Sanxenxo, investígaselle como presunta autora dun delito de falsidade documental, segundo informou o instituto armado.
A investigación partiu da denuncia presentada por un profesor dun instituto de educación secundaria, tras comprobar que se falsificou a súa firma no boletín de notas dun alumno, que cursara segundo de bacharelato no seu centro de ensino.
A revisión do boletín de notas realizouna cando se recibiu no centro unha solicitude de informe por parte dunha universidade estadounidense, xa que o documento carecía de validez ao non estar asinado polo director do centro.
Foi entón cando os investigadores comprobaron que a muller falsificara o boletín de notas correspondente ao seu fillo, coa finalidade de presentalo para a concesión dunha bolsa e a súa admisión nunha universidade de Estados Unidos.
As dilixencias contra ela foron entregadas no xulgado de garda de Cambados, onde deberá acudir a investigada cando sexa citada pola autoridade xudicial.