Novo sábado sen feira ambulante en Pontevedra. Este 30 de setembro estaba prevista a estrea da nova localización elixida polo Concello para a actividade do mercadillo na avenida Bos Aires, pero os feirantes, como xa anunciaran, non a secundaron. Si instalaron a estrutura dalgún posto para ocupar a rúa e garantir que o tráfico seguise pechado e, ademais, protestaron colapsando a circulación pola contorna. 

O dispositivo especial de tráfico deseñado pola Policía Local de Pontevedra para garantir a celebración da feira en Bos Aires empezou a circular á primeira hora da mañá.

A partir das 7.00 horas, pechouse a circulación na avenida, deixando abertos os carrís en sentido ponte da Correntes - ponte de Santiago para que puidesen acceder os vehículos ao mercado municipal, o centro histórico e o aparcamento, e pechouse o resto para permitir a instalación dos postos da feira. 

Unha hora despois, unha vintena de feirantes presentouse na zona con intención de realizar a súa habitual protesta dos sábados, na que percorren a cidade nos seus coches en caravana, e sen intención de montar os seus postos de venda ambulante. 

Con todo, si montarón a estrutura dalgún deses postos e colocaron as súas pancartas reivindicativas para garantir que, desta forma, a avenida non puidese abrirse ao tráfico. 

Tras algún pequeno enfrontamento con vendedores da praza de abastos que lles reprochaban a súa actitude, procederon a realizar a súa habitual protesta, que este sábado propuxo maiores colapso de tráfico que os habituais. 

Así, por unha banda, activaron os semáforos de peóns da zona de Domingo Fontán e o pavillón municipal, provocando atascos na circulación. Por outro, ao redor de 20 coches dos feirantes crearon unha caravana coa que paralizaron a circulación da cidade, provocando que o tráfico fose moito máis lento do habitual. 

Tras esta estrea frustrada, mantense activo o conflito que se mantén desde hai meses entre os feirantes e o Concello de Pontevedra pola localización do mercadillo e os vendedores mantéñense firmes na súa intención de montalo na Alameda ou, como moito, de forma temporal na avenida de Bos Aires, pero con estritas condicións que agora mesmo non se cumpren.