O Colexio de Farmacéuticos de Pontevedra lanza un aviso a navegantes para todos os donos de mascotas por mor da entrada en vigor da nova Lei 7/2023, do 28 de marzo, de protección dos dereitos e o benestar animal. a pesar de que esta norma autoriza o acceso de animais a establecementos públicos e privados, nas farmacias non está permitido.

Asi, lembran que a Lei de Ordenación Farmacéutica de Galicia, en vigor desde finais do mes de xullo de 2019, prohibe a entrada e permanencia de animais nas farmacias, coa excepción dos cans de asistencia.

As farmacias realizan esta aclaración porque desde a entrada en vigor da nova lei están a recibir consultas de usuarios sobre o acceso de animais indicando que a norma permite aos titulares dos establecementos, sexan estes públicos ou privados, facilitar o acceso de animais ás súas instalacións, sempre que non constitúan un risco para as persoas, outros animais e as cousas.

O Colexio de Farmacéuticos aclara que esta mesma disposición matiza que debe terse en consideración a normativa sobre saúde pública, ou as ordenanzas municipais ou normativa específica. A este respecto, as farmacias son establecementos sanitarios e contan cunha normativa específica que as regula.

A presidenta do Colexio de Farmacéuticos de Pontevedra, Alba Soutelo, explica que "a Lei de ordenación farmacéutica é de obrigada aplicación e, por tanto, os farmacéuticos non están facultados para decidir se permiten ou non o acceso de animais nas farmacias. Simplemente non poden permitilo porque a Lei prohíbello".

O Colexio distribuíu carteis ás farmacias para que informen os usuarios de forma visible desde o exterior sobre esta medida e en moitas xa están colocados. Algunhas dispoñen dun espazo no exterior para que os donos deixen os seus cans, que agora terán que retirar.

"Para algúns usuarios vai supoñer un inconveniente non poder entrar co seu can na farmacia nin tampouco poder deixalo na porta, pero non é unha decisión dos farmacéuticos, senón que vén imposta pola normativa sanitaria”, sinala Alba Soutelo.