A conselleira de Infraestruturas e Mobilidade, Ethel Vázquez, anunciaba este venres que as obras do emisario submarino da depuradora dos Praceres, na ría de Pontevedra, xa se atopan finalizadas e en período de probas.

Está previsto que o luns se acometa o corte para afrontar a conexión do emisario antigo co novo e establecer as probas de comunicación coa planta, segundo indicaron desde a consellería.

Ao longo da próxima semana continuarán as probas xa coa auga residual circulando pola nova canalización. A finais deste mes de setembro, a Xunta de Galicia espera que a infraestrutura se atope a pleno rendemento.

En canto ao antigo emisario, Ethel Vázquez reiterou de que permanecerá na ría ao dispor de quen queira conectarse, abrindo esa opción á empresa Ence.

O investimento realizado no novo emisario supera os 12 millóns de euros e, segundo a Xunta de Galicia, busca mellorar a saída das augas depuradas, optimizando a dilución e a dispersión de maneira que non afecte a actividade extractiva ou o baño.