Pepa Pardo culpa o PSOE de que a feira abandonara a Alameda por ceder o "poder de decisión" a Lores
Por Anxo Lourido
Pepa Pardo, concelleira do Partido Popular, anunciaba este mércores a presentación de emendas do seu grupo municipal á proposición socialista de modificación puntual da Ordenanza que regula o mercado ambulante. Trátase dunha disposición do ano 1997.
A proposición socialista busca que o mercado ambulante permaneza na Alameda, atendendo á demanda dos vendedores ambulantes.
Os populares sinalan que é necesaria a proposta popular para delimitar as competencias da materia no pleno e, desta forma, evitar que "quede en mans do alcalde", unha situación que se produce ata o de agora.
A concelleira popular lamentou as "improvisacións" do PSOE durante o anterior mandato e sinalou que "o PSOE non debe enganar os pontevedreses". Lembrou que Yoya Blanco, cando era concelleira do grupo de goberno en abril, tramitou a nova ordenanza en 2023, con apoio do BNG. Nesa ordenanza figura a rúa Rafael Areses como a localización para a feira en lugar da Alameda, apuntou a representante do PP.
Pardo acusou os socialistas de ignorar as alegacións do PP cando alertaba de que aquela decisión permitía ao alcalde reverter a situación devolvendo a feira a Rafael Areses."O PSOE é cómplice do BNG", afirmou Pepa Pardo insistindo en que Lores continúa na alcaldía grazas aos socialistas.
No próximo pleno ordinario, os populares teñen previsto apoiar a modificación puntual da Ordenanza de 1997 pero establecendo que o pleno sexa o órgano competente de maneira definitiva e a xunta do goberno local será responsable para facer cambios de maneira provisional en situacións excepcionais.
Ademais, Pepa Pardo apuntou que estudan a posibilidade de utilizar unha base artificial durante o inverno na Alameda de Pontevedra para evitar que se embarre todo o recinto e puxo como exemplo deste sistema cidades como Londres ou París.
POSICIÓN DO BNG
O goberno do BNG, segundo indicou Eva Vilaverde, mantén que non existe novidade sobre esta cuestión e a proposta da administración local segue sendo o traslado á avenida de Bos Aires, diante do Mercado municipal.
Vilaverde manifestou que o BNG analizará en comisión as modificacións que se presenten á Ordenanza para pronunciarse sobre elas.
VENDEDORES AMBULANTES
Pola súa banda, a Asociación Galega de Ambulantes segue reclamando unha reunión urxente co alcalde e coa actual concelleira de Promoción Económica. Lembran que non son grandes empresas e que teñen dereito a ser escoitados.
insisten na Alameda como espazo habitual para a celebración da feira ao entender que funciona como un motor económico tamén para a cidade. "Non somos nin máis nin menos que ninguén, e un goberno debe atender as solicitudes das asociacións sen ter en conta a cor política, a conta corrente ou o grao de amizade dos que o solicitan", apuntan os ambulantes.
Por último, preguntan ao goberno local que alternativa propoñen para a celebración da feira durante a Gran Final das Series Mundiais de Tríatlon xa que a avenida de Bos Aires e Rafael Areses tamén serán ocupadas pola proba deportiva.
Relacionadas:
-
O 30 de setembro celebrarase a feira ambulante na avenida de Bos Aires
Por Oskar Viéitez |
-
Pepa Pardo (PP) esixe unha rectificación a Yoya Blanco (PSOE) por comparala co ministerio de propaganda nazi
Por Anxo Lourido |
-
Yoya Blanco, concelleira do PSOE, asegura que ao PP non lle gusta a feira no centro
Por Redacción | Creada e actualizada
-
Os ambulantes irromperán na Feira Franca e o Mundial de Tríatlon se Lores non cumpre a súa promesa de hai 35 anos
Por Natalia Puga & Mónica Patxot |
-
Iván Puentes insiste en que "non hai razón obxectiva ningunha" para non trasladar a feira á Alameda e ve "certa desinformación"
Por Natalia Puga |
-
O Goberno local denuncia unha "utilización perversa dos vendedores ambulantes"
Por Natalia Puga |