Xunqueira de Alba

Pontevedra reclama ao Estado a devolución de dúas parcelas sen uso na Xunqueira de Alba

Por Alejandro Espiño
Luns 26 de Xuño, 2023 ás 15:13 do Luns 26 de Xuño, 2023

Dúas parcelas, unha de 5.026 e outra de 4.995 metros cadrados, son as que o Concello de Pontevedra vén de reclamarlle a Patrimonio do Estado. Están na Xunqueira de Alba e, actualmente, non contan con ningunha edificación construída nin uso de ningún tipo.

O alcalde, Miguel Anxo Fernández Lores, deu conta do inicio do expediente para a súa transferencia co fin de seguir traballando na recuperación deste espazo natural, do que xa desapareceron a imprenta provincial e o parque de maquinaria da Deputación.

"Estamos a falar de dúas parcelas que non teñen ningún uso nin identificación", subliñou Fernández Lores, que explicou que ademais o Estado está pagando o IBI por elas "e os funcionarios entenden que non ten moito sentido".

De feito, unha delas pertencía ao Ministerio de Industria e a outra ao Ministerio de Vivenda e que, ao non ter uso, pasaron a depender de Patrimonio do Estado.

Este procedemento vai paralelo ás outras solicitudes e peticións a outras administracións "que xa fomos facendo ao longo dos últimos tempos", recordou o alcalde.

A este respecto, o rexedor insistiu en que o Concello seguirá demandándolle á Xunta e ao Estado que colaboren na recuperación deste espazo natural, para o que lles pediu que "vaian pensando e buscar alternativas á hora de desocupar estes terreos".