O Partido Popular volve a pedir ao Goberno en funcións da Deputación de Pontevedra que paralice toda toma de decisións que podan comprometer de xeito directo as prioridades do novo Goberno provincial, así como o orzamento da institución para o segundo semestre do ano.

Nesta liña, o voceiro do grupo provincial do PP, Jorge Cubela, denuncia que "PSOE e BNG están apurando nestas semanas, ata que se produza o cambio de goberno, a sinatura de convenios e o reparto de fondos entre concellos afíns, cando as súas funcións deben limitarse exclusivamente á administración ordinaria". 

Por iso, esixe "que cesen o reparto arbitrario destes fondos, que están comprometendo o futuro da institución".

Esta petición xa a formularon os populares hai vinte días, "pero, desde entón, o Bipartito está acelerando a resolución de convenios para deixar coas mans atadas ao futuro Goberno". 

Cubela sinala que esta é "unha decisión nada ética e imprudente" e que, a xuízo de Cubela, "pecha o círculo do Bipartito nestes oito anos". Segundo afirma "chegaron paralizando proxectos que estaban en marcha en concellos gobernados polo Partido Popular, e deixan a institución repartindo fondos arbitrariamente entre concellos afíns ao Bipartito".