A Deputación de Pontevedra anunciou este luns que o departamento de Patrimonio repartirá 390.948 euros en axudas para proxectos de rehabilitación e sinalización do patrimonio histórico cultural en toda a provincia.

En total financiaranse 48 actuacións de posta en valor da riqueza patrimonial en concellos de todas as comarcas mediante a súa recuperación e mellora. Na comarca de Pontevedra, actuará en cinco municipios. 

Así, concede axudas para a iluminación interior e reparación de fachadas na capela de San Marco en Barro, para a recuperación da estela romana de San Cristovo de Couso en Campo Lameiro, para a rehabilitación do cruceiro dos Barreiros en Cerdedo-Cotobade, para recuperar o lavadoiro de Cabián en A Lama e para recuperar a fonte lavadoiro da Igrexa de Forzáns en Ponte Caldelas.

A deputada de Patrimonio, María Ortega, lembrou que estas axudas, que se puxeron en marcha no ano 2016, pretenden a restauración de bens inmobles de titularidade municipal que teñan un recoñecido valor arquitectónico, histórico, artístico, paleontolóxico, arqueolóxico ou etnográfico, ademais dos conxuntos urbanos, sitios naturais, xardíns e parques que teñan valor artístico, histórico ou antropolóxico.