O estudo Nieto Sobejano Arquitectos gañou o concurso para a rehabilitación do antigo convento de Santa Clara para convertelo na sétima sede do Museo de Pontevedra.

A proposta formulada por Nieto Sobejano impúxose á dos outros catro equipos finalistas: Kaan Architecten BV (en segundo lugar), a UTE formada por David Chipperfield e Carlos Seoane (terceiro lugar), Kengo Kuma (cuarto) e Snohetta Oslo en UTE con Alfonso Penela (quinto). 

O vicepresidente da Deputación de Pontevedra, César Mosquera anunciou o resultado nunha rolda de prensa na que destacou o gran nivel deste concurso de ideas no que "os problemas que se expuñan eran francamente complexos". 

O gañador leva un premio de 60.000 euros e o resto terán 4 accésit de 30.000 euros. "O seguinte paso, que en principio non imos dar, é adxudicarlle a redacción do proxecto ao gañador", apuntou Mosquera, "iso, en principio, queda para a próxima Corporación a menos que teñamos algunha comunicación por parte do próximo goberno de que o fagamos para ir gañando tempo". 

Pola súa banda o director do Museo de Pontevedra e presidente do xurado, Xosé Manuel Rey, expresou a "satisfacción tan grande" dos membros do xurado por este proceso de selección afirmando que foi "moi enriquecedor" aplicando a perspectiva de diferentes disciplinas e destacou "o extraordinario traballo e a gran calidade da documentación de todas as propostas".

Despois de catro días de deliberación o xurado considerou que o proxecto "Verbas da pedra" responde "de maneira sobresaliente ao desafío de transformar un recinto con vocación de illamento nun lugar público".

O presidente do xurado lembrou que "este proxecto ten que madurar, ten que evolucionar para acabar converténdose nunha solución definitiva" polo que "queda, no caso de que o proceso se materialice, unha discusión moi profunda con todo o equipo do Museo para axustar algunhas disfuncións puntuais, algún desaxuste, para reforzar partes moi potentes e para minimizar algunhas cuestións".

O xurado valorou moi positivamente cuestións como a integración dun espazo que se converte nun miradoiro cara ao claustro e que permite ordenar toda a circulación e toda a distribución de usos do complexo. 

"Este é un proxecto de cidade que non ten que ver cunha forza política ou outra e que espero que haxa altura de miras como para que ninguén o estea torpedeando", dixo César Mosquera que considera que é unha "garantía que o presidente da Xunta dixese que non se ía a quedar fóra de Santa Clara".

O estudo Nieto Sobejano Arquitectos atesoura unha ampla experiencia no sector cultural ao deseñar, entre outros moitos, o Museo Nacional de Escultura (Valladolid), a ampliación do Museo de Arte de Moritzburg (Alemaña) a rehabilitación de Citeina du Théâtre (Francia) e tamén gañaron o concurso para o novo Museo de Belas Artes de Vannes (Francia).