A cimentación e os muros de contención centran as obras da primeira fase de 'Batea en Terra'
Por Redacción
No porto deportivo de Sanxenxo, as obras da primeira fase de 'Batea en Terra' avanzan segundo os prazos e non se prevé superar os cinco meses de execución dos traballos.
Tras as instalacións subterráneas, a obra céntrase agora na cimentación e alzado dos muros de contención.
En aproximadamente quince días comezará a pavimentación do espazo con laxas de granito que se empregarán para cubrir a superficie e tamén para os bancos. A cor da pedra foi elixido tras a proba de máis de 10 mostras diferentes.
O elemento central desta primeira fase será a creación dun noiro axardinado que substituirá as anteriores bancadas-escaleiras que comunicará a Praza dos Barcos e a Praza do Mar. O deseño da plantación inspírase en paisaxes de costa que salpican o litoral e se intercalan entre as zonas urbanas e os areais das Rías Baixas.
Optouse por introducir especies autóctonas propias da comunidade pola súa resistencia aos ventos, a salinidade e o seu baixo consumo de auga. Precisamente, con este obxectivo serán retiradas as seis palmeiras que se sitúan na Praza dos Barcos. Tras consultalo con especialistas en arboricultura, serán trasplantadas á zona verde situada enfronte do Pazo de Emilia Pardo Bazán e será esta firma especializada a que se encargue de facelo nos próximos días.
Un dos piares base no desenvolvemento da infraestrutura verde é o uso, a selección e a xestión sostible da vexetación na planificación urbana. Neste caso seleccionáronse plantas autóctonas ou adaptadas a condicións adversas (baixas necesidades hídricas, resistencia á salinidade) o que conleva unha diminución nos custos de mantemento do espazo en base á redución das achegas hídricas, pódalas e os tratamentos fitosanitarios. De feito, só necesitarán rega o primeiro ano e medio desde a súa plantación.
O obxectivo é a creación dun auténtico pulmón verde en pleno centro urbano de Sanxenxo, no que se plantarán 33 árbores (piñeiros e tamarices), 4.369 arbustos de oito variedades diferentes e un total de 10.289 plantas. As especies serán autóctonas, de diferente porte e con distintos estados de floración que permitan ter unha variación cromática ao longo do ano.
En canto ao xardín que xerará unha continuidade topográfica como un elemento charnela entre a Praza dos Barcos, o Paseo de Silgar, o Paseo dous barcos, o dique e os portos pesqueiro e deportivo. Mantense un acceso rodado ao porto pesqueiro polo exterior da praza, con carácter restrinxido. O aparcamento mantén as prazas actuais. Mantéñense todos os locais comerciais en concesión, sen intervención ningunha, axustando para iso a pendente do xardín.
A intervención desta fase contempla tamén a rehabilitación e mellora do pavimento na Praza dos Barcos e a súa integración dentro do proxecto, a redistribución do mobiliario urbano existente e a simplificación e unificación de todos os elementos de sinalética.
Relacionadas:
-
A nova rampla axardinada do porto de Sanxenxo toma forma
Por Redacción |
-
As obras da "Batea en terra" mantéñense durante o verán
Por Redacción |
-
O Atlante durmirá unha tempada na Praza dos Barcos por culpa das obras
Por Redacción |
-
A reconversión do ámbito portuario nunha 'batea en terra' comezará tras a Semana Santa
Por Redacción |
-
A ampliación da concesión do porto ata 2047 desbloquea a 'Batea en terra'
Por Redacción |