Este xoves, Marga Caldas xunto con parte da súa candidatura, presentou as cinco líneas xerais que artellan o programa do BNG de Poio.

Segundo afirmou a candidata nacionalista "este documento é un programa claro, conciso e directo, pensado para dar resposta ás necesidades das veciñas e vecinos deste Concello"

A mellora de espazos rurais e urbanos, máis infraestruturas viarias, máis dinamismo económico, deportivo e cultural, máis proximidade e o desenvolvemento da zona de equipamentos da Canteira da Graña son as cinco ideas clave nas que o BNG basa o seu programa.

Marga Caldas manifestou que "grazas á xestión económica do Concello puidemos mercar os terreos da Canteira da Graña, uns terreos que teñen unha extensión que van permitir acoller infraestruturas estratéxicas para o noso concello".

Entre outros equipamentos pensados para este espazo está "un novo pavillón eficiente enerxéticamente, que de resposta ás solicitudes e necesidades do tecido deportivo de Poio, cunha altura sufiente para a práctica da ximnasia rítmica, cun graderío que permita acoller probas internacionais de alto nivel, con novas pistas polivalentes e espazos de almacenaxe".

A candidata nacionalista engadiu para este mesmo entorno "a creación dun novo centro de saúde, que acolla todos os servizos necesarios para a veciñanza", con salas especializadas e técnicas, con profesionais da psicoloxía, fisioterapia ou hixiene dental. 

"Sempre, subliñou Marga Caldas, tal e como se lle fixo constar ao Conselleiro de Sanidade, mantendo a cercanía dos consultorios de Raxó e Combarro". "Ademáis, coa construcción deste novo centro de saúde permitiría a conversión do actual en Anafáns, nun centro de día tan necesario para a veciñanza do noso concello, que ademáis xa está preparado para acoller unha instalación desta índole", engadiu.

A candidata do Bloque indicou que "esta parcela nos permite dar resposta a unha demanda cultural como a construcción dun auditorio e á súa vez a execución dunha infraestrutura viaria de novos accesos a Campelo, así como a construcción de novos espazos de aparcamento e zonas verdes".

Marga Caldas, anunciou á súa vez que o Concello leva tempo negociando co Arzobispado para a compra da escola infantil de Campelo, que se convertirá nun espazo polivalente que dinamizará a toda a contorna.