Aparece o cadáver dun home dentro dun pozo de Cambados
Por Redacción
A Garda Civil investiga un estraño achado realizado sobre as 12.00 horas do mediodía deste martes en Cambados. O cadáver dun home de 45 anos apareceu flotando nun pozo dun terreo particular de Castrelo.
Segundo informaron fontes da Garda Civil, a Policía Xudicial do posto de Cambados se desprazou ao lugar e está a investigar os feitos. Ata o momento non decartan ningún tipo de hipótese e para lograr extraer algún tipo de conclusión sobre o acontecido será necesario levantar o cadáver e realizarlle a autopsia. Ás 14.00 horas aínda seguía o corpo no lugar.
Segundo informou o Centro de Atención de Emerxencias de Galicia 112, un particular alertou a ás 12.15 horas de que un corpo aparecera flotando e deuse aviso a efectivos do parque de Bombeiros do Salnés, que empezaron a traballar para rescatar á persona en cuestión, pero xa estaba sen vida.
Ao lugar desprazáronse tanto a Garda Civil coma a Policía Local e Protección Civil de Cambados á espera de que o xuíz de garda de Cambados decretase o levantamento do cadáver.
Aconteceu nun terreo do lugar do Facho, en Castrelo, e fontes de Protección Civil de Cambados sinalaron que o falecido é Ramón Ch.M., de 45 anos. Podería ser o propietario do terreo no que está situado o pozo.